Kim Kielsen oqaaseqarusunngikkallarpoq
Kim Kielsenip sila pillugu ataatsimeersuarnermi Polenimi pisumi peqataanerminut atatillugu danskit silap pissusaannut ministeriat Connie Hedegaard ataatsimeeqatigaa. Tamannalu qanoq inerneqarnersoq itinerusumik oqaaseqarfigerusunngilaa, avammut allakkiassaq naammassitsiigamiuk.
Allattoq Louise M. Kleemann
Naalagaaffiit Peqatigiit sila pillugu sapaatip-akunnera kingulleq ataatsimeersuarneranni nunanit 192-init peqataaffigineqartumi, nunatsinnit peqataasoq silamut tunngassuteqartunut naalakkersuisoq Kim Kielsen ullumi tikippoq:
- Danmarkimi silap pissusaanut ministeri Connie Hedegaard ataatsimeeqatigaara. Aamma isumaqatigiippugut januaarimi ataatsimeeqqinniarluta, Kim Kielsen oqarpoq.
Neriorsuutigaalu Københavnimi aappaagu ataatsimeersuarnissaq sioqqullugu paasissutissanik kingusinnerusukkut apuussiumaarluni.