Nunatsinni imaatigut angallanneq ulluni kingullerni sammineqangaatsiarpoq, aamma radioviisikkut.
Umiarsuartigut angallanneq aaqqiivigineqartariaqartoq partiit tamangajalluinnarmik isumaqarput. Ingammik kujataani avannaanilu angallanneq.
Aappaatigooqarporli, aaqqiinissamummi nunarput aningaasassaqanngilaq.
Imaatigut angallannermi aaqqitassat aningaasalersorneqarnissaat imaannaanngitsorsuuvoq.
Imaatigut angallannerup maannamut ingerlarnga angallannermut pisortaqarfimmit ullaap tungaani nalilersorneqarpoq.
Angalannermut naalakkersuisoq Kim Kielsen ima allappoq, issuaaneq aallartippoq:
”Angallannermut suliassaqarfimmut annertunerusunik aningaasaliisoqaqqissappat suliassaqarfinni allani aningaasaliissutinik ilanngarterinissaq pisariaqassaaq.
Taamaattumik kaammattuutigissavara angallannermut annertunerusunik aningaasaliinissamik siunnersuuteqartoqartillugu, aningaasat suminngaanniit tiguneqassanersut ilanngullugu siunnersuutigineqartassasoq”, issuaaneq naavoq.
Angallannermut suliassaqarfimmut 95 millioni koruuninik sipaaruteqartoqarnissaa naalakkersuisut inatsisartunit peqquneqarnikuunerat Kim Kielsenip eqqaasitsissutigaa, taakkulu angallannermut missingersuutinut pingajorarterutaattut annertussuseqartut oqaatigalugu.
- Sipaarutissat taamatut annertutigisut sullissinernut sunniuteqarnissaa pingitsoorneqarsinnaanngilaq, Kim Kielsen tusagassiuutinut allagaqaateqarnermini allappoq.
