Kim Jong-unip sunaluunniit nunanit allaneersoq akeqqersimaarfigigaa
Nunat allat sutigut tamatigut sunniuteqarsinnaannginnissaat pillugu, inatsit nutaaq Korea Avannarliup atuutilerseqqammerpaa.
Kinaluunniit atisanik nunanit allaneersunit atisaqartoq, nipilersukkanik nunanit allaneersunik pigisaqartoq, nunalluunniit allat oqaasiliaannik atuisoq, sakkortuumik pineqaatissinneqarsinnaalissaaq, BBC taama allaaserisaqarpoq.
Korea Avannarlermi sunaluunniit matoqqatinneqarpoq. Interneteqanngilaq, inoqatinut attaveqaatit matoqqapput, naalagaaffiullu tv-qarfii taamaallaat isiginnaarneqarsinnaallutik, taakkunanilu aallakaatinneqartartut naalagaaffimmit aamma aqunneqarlutik.
Korea Avannarliup aqutsisuata Kim Jong-unip nammineq oqaatigisai naapertorlugit qanganitsanut uteqqinniartut kikkulluunniit taamaalilluni akiorniarneqarput.
Assersuutigalugu Korea Kujallermit, USA-mit Japanimiilluunniit tusagassiaateqartut kikkulluunniit, toqumut pillagaasinnaalissapput, ukiulluunniit 15-it parnaarussassanngortittoqarsinnaalissalluni.
Inuusuttut akornanni imminuinnaq eqqarsaatigalutik sulisut, socialistinilluunniit illuatungiliiniat
inuusuttut suliniaqatigiiffiinit sakkortuumik iliuuseqarfigineqartassasut, Kim Jong-unip allagaqaammi piumasaraa.
Nunanit allanit oqaasiinik atuineq, atisanilluunniit nunanit allaneersunik atisaqarneq ulorianartuusoq, taanna isumaqarpoq.
