Kim Godtfredsen: Nunaqarfimmiut namminneq aalajangeeqataassapput

- Nunaqarfinnik matusisoqassappat, nunaqarfinni innuttaasut suleqatigalugit tamanna pissaaq, taakkulu namminneq aalajangeeqataassapput. Taama oqarpoq Siumup Nuummi siulittaasua, Kim Godtfredsen, Demokraatit sinnerlugit ilaasortamut, Palle Christiansenimut, akissuteqarluni.
marsip 23-at 2009 05:28

Nunaqarfiit hornorujut inorlugit inullit tamarmik matuneqarnissaat Palle Christiansenip arfininngormat siunnersuutigaa.

- Nunaqarfiit akilersinnaanngitsut matuneqarnissaat siunnersuutigaat! Kalaallit Nunaannili illoqarfiit sorliit ammatissallugit akilersinnaagamik? Nunaqarfiit 300-t inorlugit inullit matuneqarnissaat tulliani siunnersuutigissaviuk?, Kim Godtfredsen aperaaq.

Taanna isumaqarpoq, nunaqarfinni innuttaasut siunissaq pillugu pitsaanerusumik oqaloqatiginnittoqartariaqalersoq. Nunaqarfiit sunik tunniussaqarsinnaappat, nunaqarfinnilu aqutsisut nutaat atuutilerpata suna anguniarneqassava?

- Kisitsisit takutippat nunaqarfiit inuerukkiartortut, naak innuttaasut nuunnissaannik qinnuigineqarneq ajoraluartut. Tamannalu aallaavigalugu politikerit sulisariaqarput, Kim Godtfredsen oqarpoq.

- Aningaasaqarnitta ilungersunarsiartornera pissutigiinnarlugu nunaqarfiit matooraatigalugit ingerlassagutta, kukkussutitta anginersaasa ilungersunarnerpaallu tamanna ilagissavaat. Tamannalu akissaqartinngilluinnarparput, aningaasatigut inuuniarnermilu, Siumup Nuummi siulittaasua, Kim Godtfredsen, naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq