Killissarput nallerneqarpoq
Killissarput nallerneqarpoq – nunatsinni meeqqat atugaat naammaginanngitsorujussuupput.
Taama isumaqarput suliniaqatigiit imminnut taasimasut ”Meeqqat Kalaallit Nunaanni ajunnginnerusumik inuuneqalernissaat pillugu suleqatigiit”.
oktobarip 24-at 2007 08:15
Ajornartorsiutit iliuuseqarfigineqartariaqartutut isigisatik pillugit suleqatigiit novembarip 14-anni Nuummi akerliussutsimik takutitsillutik ingerlaaqatigiinnermik aaqqissuussiniarput.
Suleqatigiit ilaatigut atsiornernik 1.800-nik katersisimapput ingerlaaqatigiinnermullu atatillugu taakkua politikerinut tunniunniarpaat.
Aaqqissuussisut ilaatigut isumaqarput politikerit pingaartitaat kukkusuusut:
- Ilumoorsinnaanerpa, politikerit isumaqarmata nunatsinni meeqqat qaarsilaarlutik innartarnissaanniit uumasuussivissuaqarnissaq aamma mittarfeqarnissaq pingaarnerusut?
Suleqatigiit aamma oqaatigaat meerartatta 9 procentii piitsuullutik inuusut aamma ukiut tallimat kingulliit ingerlaneranni meeqqat inuusuttullu 49-t imminut toqussimasut.
