Killigititap ataqqinissaa neriorsuutigiumanngilaat

- Pinngortitamik pingaartitsinerput inatsisinik unioqqutitsinaveersarnermit pingaaruteqarneruvoq, Greenpeacimi sulisoq, Jon Burgwald KNR-imut oqarpoq.

Kisianni maannakkut pissutsit taama isikkoqarallartillugit killiliunneqarsimasup qaangernissaa pilersaarutigineqanngitsoq, Jon Burgwaldip oqaatigaa.

Greenpeacep umiarsuaa Esperanza Cairn Energyp umiarsuaanit Stena Donimit aamma Stena Forthimit 700 meterisut qanitsigisumiippoq.

- Qillerivimmi Stena Donimi aamma umiarsuarmi qilleriviutigisumi Stena Forthimi sulisut isigaavut. Aamma qillerisut paarilluarneqaqisut takusinnaavagut. Aamma siku uuliamik qillerisup tungaanukartoq peersikkaat ullumi takuarput, Jon Burgwald oqarpoq.

Uuliamik misissuisunut iliuusissamik pilersaarusiorlutik Greenpeacep nittartakkamini ilimasaarutigereerpaa.

Greenpeace isumaqarpoq, Cairn Energyp uuliamik misissuinera navianartuusoq unitsinneqartariaqartorlu.

- Akerliuniarluta maaniippugut. Cairnip suliaanut akerliuvugut, akerliunerpullu takutipparput suliaannut assiliisaqattaarnikkut, assilisagullu nassiussortarpagut kikkut tamarmik takusinnaaniassammatigit. Aamma akerliunerput takutinniarlugu allagartarsuarnik siaartiterinikuuvugut, Jon Burgwald oqarpoq.

Sakkutuut umiarsuaat aamma politiit angallataat uuliamik misileraallutik qillerisut eqqaanniittut, Kalaallit Nunaanni politiinit politikenimut oqaatigineqarpoq.

- Greenpeacermiut inatsisinik unioqqutitsigunik tigusaasinnaapput imaluunniit akiligasssinneqarlutik, politimesterip tullersortaa Morten Nielsen politikenimut oqarpoq.

Aamma oqartussat killiliussaata avataaniiginnarnissartik Greenpeace-meersup erseqqivissumik neriorsuutigisinnaanngilaa.

- Greenpeace isumaqarpoq nunap pissarititai pingaaruteqartuusut, pisariaqalissappat inatsisit qaangerlugit iliussaagut. Aatsaat pisariaqalivissappat inatsisinik unioqqutitsissaagut, Jon Burgwald KNR-miit oqarpoq.