Killeqarfilerngusaanneq suli

Nunat issittunik nunaatillit ukuusut - USA, Rusland, Danmark, Norge aamma Canada - taakku politikkikkut aquttui aqagu ataatsimeeqatigiissapput, illoqarfimmi Chelsea-mi Canadamiittumi. Qalasersuup Avannarliup suleqatigiissutigineqarnerata ineriartortinneqarnissaa ataatsimiissutigineqassalluni.
Allattoq Apollo Jeremiassen
marsip 28-at 2010 17:02

Ataatsimiinnermi peqataassapput amerikamiut nunanut allanut ministeria, Hillary Clinton taassumalu suleqataanik taaneqarsinnaasoq, russit nunanut allunut ministeria, Sergej Lavrov. Inatsisit atortinneqarnerannut ministeri Lars Barfoed Danmarkimiit aallartitatut peqataassaaq taannalu nunatsinni Naalakkersuisut siulittaasuannit, Kuupik Kleistimit peqatigineqassalluni.

Suleqatigiinneq siunertaralugu nunat naapeqatigiissapput. Canadamiut sakkutooqarnermut naliliisartuisa qanittumi misissuinermi paasivaat, nunani issittuni sakkutooqarneq ineriartortinneqartoq tamannalu aarlerinartoq oqaatigalugu. Nunat taakku tallimat umiarsuarnik sorsunnermi atoriaannarnik 66-nik sanaartorsimapput - taakkulu nunani issittuni atorneqarsinnaapput.

Imartani uuliaqarsorineqarnera aamma aatsitassaqarsorineqarnera pissutaalluni isumaqatigiinniarnerit pissanganartorsiorfiupput. Taamaatumilluuna killeqarfilerngusaanneq taama sakkortutigisoq. Assersuutitut taaneqarsinnaavoq, Rusland oqarmat, Qalasersuaq Avannarleq kisimiillutik oqartussaaffigalugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq