Killeqanngitsumik nipisanniarneq oqaluttuaannanngussaaq

Nipitsat suaat pillugit upernaat tamaasa aalisartoqartaqaaq.

Nipisat ilumut nungusaataanngitsumik aalisarneqartut MSC-mik ukiortaamiit meqqilerneqartalerpata tamanna pissaaq.

- Akuersissutit allanngortinneqarput. Ullumikkut kikkut tamangajammik pinianermut allagartallit nipisanniartarput. Taanna soorunami allanngortinneqassaaq. Tassa aalisarnermut allagartaqassapput. Taannalu ukiuni marlunni atussaaq, Aalisarnermut naalakkersuisoq Finn Karlsen oqarpoq.

Killilersuinissaq aalisartuniit kissaatigineqarsimavoq. Piviusunngortinneqalermallu nuannaarutigineqarpoq.

Nipisat suaat MSC-mik meqqilersorneqartarnissaat pisariaqarpoq, nunarsuarmi nipisat tunineqartartut 60 procentii nunatsinnit tunisassiaammata, KNAPK-mi pisortaq Petrus Biilmann oqarpoq.

- Maannakkut nunarsuarmi suaat niuerutigineqarneri 60 procentiata missaa Kalaallit Nunaata aqutaraa. Taamaammat taanna tigummiaannarusupparput annaarusunngilarput, uagut aqukkusupparput. Taamaammat uagut siulliulluta meqqilersuinissaq anguniarparput, Petrus Biilmann oqarpoq.

Nipisat suaannik tunisinermut aki ukioq kingulleq appasippoq. Massakkulli patajaallisarneqartoq, Petrus Biilmanip oqaatigaa.

Isumaqarporli aningaasat isertitat amerlissappata akit qaffaneqarnissaat pisariaqartoq.

- Ukioq kingulleq akigitinneqartuminngaanniit maannakkut nikingavallaanngilaq. Aarlerigineqaraluarpoq akikilleriallassasoq, kisianni agguaqatigiisillugu suli assigiipput, Petrus Biilmann oqarpoq.

Avammut tunisinermi MSC-mik meqqilersuisalerneq pissutaalluni akigitinneqartup qaffassinnaanissaa, Aalisarnermut naalakkersuisup aalisartullu neriuutigaat.

Aqutsiveqarfiit ataasiakkaat aalajangersimasunik pisassinneqartalisapput. Taakkunanilu ullut nipisanniarfiusussat amerlanerpaaffissaaannik aalajangersaasoqartassaaq.

Aalisarsinnaanermik uppernarsaatillit kisimik nipisanniarsinnaalissapput.

- Isumaqatigiissutit malillugit pisassiisoqartalissaaq, aqutsiveqarfikkoorlugulu pisassiisoqartalissaaq. Tassanilu qaqugu aallartissanersut KNAPK, atuisut, niuertullu isumaqatigiissutigisassavaat. Ullut qassit aalisarneqartassanersut aalajangersimassapput, Aalisarnermut Naalakkersuisoq Finn Karlsen oqarpoq.

Nipisat suaannik MSC-mik meqqilersuisalernissaq aatsaat sulissutigineqalinngilaq.

- Tamakkuninnga aalajangersimasunik siunertaqarlutik sulisitaqarpugut. Taakkualu ukiut arlallit suliarereerpaat. Taamaammat imaanngilaq aatsaat eqqartuleripput. Ukiut marlunngorput ingerlallugu, KNAPK-mi pisortaq Petrus Biilmann oqarpoq.