Kilisaataatillit malittarisassanik malinnissimanngillat
- Sulisitsisuugaanni pinngitsoorani APV-mik, tassa sullivimmik nalilersuinermik malittarisassamik, sullivik peqartariaqarpoq, taama oqarpoq Flemming Nygaard Christensen. Taanna Danmarkimi Fiskeriets Arbejdsmiljørådimi pisortaavoq, aalisariutini isumannaallisaanermik aammalu aalisariutit sullivittut atorneqarneranni siunnersuisartuullutik.
Flemming Nygaard Christensen aamma isumaqarpoq, kilisaatip Markusip, APV-mik peqarsimannginnerata kingunernik, umiarsuarmi sulisut isumannaatsumik sulliveqarnissaat ilaginnarneqarsimasoq.
- APV-mik peqannginnerup kinguneraa, kilisaammi sulineq oqaloqatigiissutigineqarsimanngitsoq qanoq suleriaaseqartoqarsimaneranik, Flemming Nygaard Christensen oqarpoq.
Sulliviup isumannaatsuunissaa qulakkiissagaanni pinngitsoorani malittarisassaqartariaqrpoq, taamaattoqarpallu tamanna imminut akilersinnaasoq Flemming Nygaard Christensenip aamma oqaatigaa.
- Isumannaallisaanermut allagartamik malittarisassaqaraanni sullivimmi suliat qanoq ajornannginnerusumik suliarineqarsinnaasut paasineqarsinnaavoq, Flemming Nyggard Christensen oqarpoq.
Sullivimmik nalilersuinermik malittarisassaqartussaatitaaneq 2001-mili inatsisaalerpoq. Ukiut qulingiluat qaangiussimaleraluartut, kilisaammik Markusimik piginnittut, Qajaq Trawl, suli malittarisassanik allassimasuuteqanngilaq.
- Sullivimmi nalilersuinermik allagartamik malittarisassaqarneq kilisaatini suli atuutilersinneqanngilaq, qujanarporli massakkut atuutilertussatut innersuutigineqartussanngormat, taamaaliortoqarpallu kilisaatitsinni atuuttunngortikkumaarparput, Qajaq Trawlimi piginneqataasoq, Søren Brandt oqarpoq.
Inatsisit qangali atuuttunngoreeraluartut aatsaat Qajaq Trawlimit malinneqarnialerput, aatsaallu inuup inuuneranik naleqarmat. Kilisaammik piginneqataasoq, Søren Brandt maannamut suli isumaqarpoq, sullivinni nalilersuinernut malittarisassat Kalaallit Nunaanni aalisarnermik suliaqartunut suli atuuttuutinneqanngitsut.
Søren Brandt isumaqarpoq, kilisaataatilinni allani aamma APV-mik peqartoqanngitsoq, assersuutitut taavaa Namminersorlutik Oqartussat suliffeqarfissuanni Royal Greenlandimi aamma taanna atorneqanngitsoq.
- Paasisakka naapertorlugit aamma taakku APV-mik peqanngillat, Søren Brandt oqarpoq.
Royal Greenlandilli taamaattoqannginnerarpaa:
- Uagut kilisaataatitsinni pinngitsoorata sullivimmi isumannaallisaaneq eqqarsaatigalugu malittarisassaqarpugut, aammalu sullivinni nalilersuinernut malittarisassat atuutsinneqarlutik. Uanga nammineerlunga kilisaatini taamaattoqarnissaa isumagisaraara, tassami inatsisini allassimareermat APV-mik kilisaatini malittarisassaqassasoq, Royal Greenlandimi maskininspektøri aammalu kilisaatini isumannaallisaanermut akisussaasuusoq, Peter Amossen oqarpoq.
Taanna aamma oqarpoq, Qajaq Trawlip APV-mik peqannginnerata inuit isumaqalersissanngikkai kilisaataatillit tamarmik taamaattumik peqanngitsut.
Imarsiornermik Qullersaqarfiup Paasiniaatitsisarfiata nalunaarusiaani siunnersuutigineqarpoq, kalaallit kilisaataasa sullivigineqarnerat ataatsimut nalilersorneqassasoq. Paasiniaasut nalunaarutaanni siunnersuutigineqartut, ullut 14-nit ingerlaneranni Imarsiornermik Qullersaqarfiup isummerfigissavaat, taassumalu saniatigut aamma isummerfigissavaat pisoq eqqartuussivikkut ingerlanneqassanersoq.
