Svend Regina Christensenilu nersornaatisereerlutik. Kim Kielsen nersornaaseereernerminilu.

Kilisaataatillit kuultiusumik nersornaatisisut

Inatsisartut siulittaasuata Kim Kielsenip aappariit Svend Christensen Regina Christensenilu kuultiusumik nersornaaserpai.

Kilisaataatillit Regina Christensen Svend Christensenillu Inatsisartut siulittaasuannit Hans Egedep illuani nersornaammik kuultiusumik ippassaq nersornaaserneqarput.

Inatsisartut tusagassiutinut nalunaaruteqarput.

Regina Christensenillu nersornaaseqannginnermini inatsisartut siulittaasuannit, Kim Kielsenimit oqalugiarfigitippoq.

- Ilaqutariittut suliffeqarfiutissinni pingaarutilimmi ukiullu ingerlanerini inuppassuarnik suliffissaqartitsisimasumi malunnaatilimmik tunniusimallutillu sulisimanerit pillugu taamatut nersornaaserniarlutit siulittaasoqarfiup aalajangersimavaa, Kim Kielsen oqarpoq.

Kim Kielsenip oqarnera naapertorlugu suliffeqarfimmik angisuumik kilisaataatileqatigiiffittut ittumik ingerlatsissagaanni ilaqutariittut mattusuujusariaqarlunilu tunniusimasoqartariaqarpoq.

Pisoq immikkuullarittoq

Nersornaat
- Nersornaat kuultiusoq ukiumut annerpaamik ataasiarluni tunniunneqartarpoq.

- Nersornaat inunnut immikkut Kalaallit Nunaannut sullissisimasunut , suliaat inuiaqatigiinnut tunngasuuppata, inuussutissarsiornermut, eqqumiitsuliornermut, ilisimatuussutsimut allamulluunniit aamma tunngasumik suliaqarsimasumut tunniunneqartarpoq.

- Inatsisartut Siulittaasoqarfiat saqqummiuliinissamik aalajangiisartuuvoq.

- Saqqarmiu kuultiusoq Namminersorlutik Oqartussat pigisaraat, saqqarmiullillu toqunerani piginnittumut utertinneqartussaatitaalluni.

 

Kim Kielsenip Svend Christensenimut oqaaseqarnermini ilaatigut uku erseqqissarpai.

- Taamaattumik suliffeqarfimmik ilaqutariittut pigisamik ukiorpassuarni illit nuliallu ingerlatsisimanissinnut inuussutissarsiutinnilu ilaqutariippassuit sulinikkut isertitaqartarsimanerannik qularnaarinnissimanissinnut nersorniarniarlusi siulittaasoqarfiup immikkut illuinnartumik aalajangersimavaa, Kim Kielsen oqarpoq.

Kim Kielsenip oqaluarnermini Inatsisartut siulittaasoqarfiata Svend Christensen kuultimik nersornaaserniarlugu aalajangersimavaa oqaatigaa. Ilaqutariimmi suliffeqarfiutaat kinguaariinni ingerlanneqartoq ineriartornermi, inuiaqatigiinni naleqarnermi kiisalu aalisarnermi inuppassuarnut suliffissaqartitsinermik pilersisimapput.

Inatsisartut siulittaasuata suliffeqarfik nunatta karsianuttaaq pingaaruteqarsimasoq aamma oqaatigaa.

- Aalisarneq aamma inuussutissarsiutaavoq ingerlaavartumik naleqqussartuarnissamut annertuumik piumasaqarfiusoq suliffeqarfinnillu patajaatsunik suliffissanik pitsaasunik qularnaarisinnaasunik piumasaqarfiusoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl