Kilisaataatillit CO2-mik mingutitsinertik aquppaat
CO2-mik mingutitsineq pillugu aalisarneq aallaqqaataaniilli malinnaatinneqarsimanngilaq, kisiannili maannakkut paasiartorneqalerpoq susoqarneranik, Søren Brandt oqarpoq.
Kilisaatit eqqarsaatigalugit ukioq 2012 tikitsinnagu piumasaqaatit anguneqarsinnaapput iluamik iliortoqarpat. CO2-mik mingutsitsineq 8 procentimik appartitisinneqarnissamik Kyotymi isumaqatigiissut malinneqassappat tamanna anguneqarsinnaavoq, qalorsuit, saarlisaartut assakaasut uuliamik atuinnginnerusut ukioq 2000-imili sanaartortoqarnikkuuupput taamaatummillu 10 procent-imik annikinnerusumik mingutsisoqarpoq Søren Brandt oqarpoq, taamaattumillu siunniunneqartoq anguneqarsinnaalluarpoq. Piniutit nutaat uuliamik atuinikinnerusut sanaartorneqartuaannarput, aamma qerititsiviiit sarfamik 70 procentimik atuinikinnerusut sanaartorneqartalerput.
Kilisaatini qerititsiviit sarfamik atuinikinnerusut Holland-imi Tyskland-imilu sanaartorneqartarput, tamakkualu malinnaaffigineqartussaapput, soqutiginarmata , Søren Brandt oqarpoq.
Søren Brandt aamma Qajaq Trawlimi pisortaasoq oqarpoq, CO2-mik mingutsitsineq pillugu isumaqatigiissusiortoqalerpat Kalaallit Nunaat immikkut isigineqartariaqartoq, aalisariutit amerliartortillugit aamma mingutsitsineq annertusiartussammat.
Qaluleriffiit pisortaat, Peter Jacob Jacobsen oqarpoq, aamma qalut sannaasa nutarterneqarnerisigut CO2-mik mingutsitsineq annikillisarneqartoq. Qalut ullumikkut atorneqartut qanga atorneqartartuniit oqinneerarsuupput kalikkuminarnerullutik. Qalut pisiaralugit akisunerugaluarlutik atorneranni kilisaatit sipaaruteqartarput. Peter Jacob Jacobsen aamma oqarpoq soorlu umiarsuit sarpii nutaaliat sipaaruteqarnermik kinguneqartartut.
