Kilisaat ajornartorsiortunik annaasseqqartoq
Royal Greenlandip nittartagaani tamanna oqaluttuarineqarpoq.
- Qujamasoqaagut kilisaatip Lumorip inuunerput annaassinnaasimammagu, angutit marluk annaanneqartut oqaluttuarput. Taakkua angallataat Trophy 27 fodseq moteriminik unittoornermi kingorna immalermat VHF radio angallattagaq atorlugu ajunaalernermik kalerrisaarinerat kilisaammit Lumorimit tusarneqarpoq.
Aalisartut taakkua ippassaani pingasunngornermi ullaaakkut Ilulissaniit piniariarlutik aallarput. Ualikkut anorlileriartormat angutit taakku marluk Qullissat avataani kisartuinnarniarlutik aalajangerput.
- Kisariitsiarluta kisatta allunaasaa kittorarmat Saqqamut, ikerasak ikaarlugu ikaaginnarniarluta aalajangerpugut. Tassanngaannaq malerujussuit portungaatsiaqisut marluk akornanni millugunneqarpugut tassalu motorerput unilluni. Angallat sukkkasuumik immalertorpoq uangalu angallammik qalusininni aappara VHF-radio atorlugu Aasiaat
radioanut atassuteqarniarsarivoq. Taamalinerani kilisaat Lumorimit Aasiaat radioanut nalunaaruteqarneq tusaasimavaat, taakkulu Aasiaat radiuatigut sumiinnerput paasereeramikku ornilertorpaatigut, 39-nik ukiulik Kristian Broberg Royal Greenlandip nittartagaani taama issuarneqarpoq.
- Taamaalinerani angallat immaannaavippoq uangalu qaloriinnaavippunga malissioqaagullu. Piffissami tasssani malerujussuaq angisooq takkusimasuuppat immap nukinginit millugussaasimassagaluarpugut, Kristian Broberg oqaluttuarpoq.
Kilisaatip Lumorip naalagaa Jakup Eli Beck annaassiniarnertik pillugu ima oqaluttuarpoq
- Anorleqimmat annaassiniarneq ajornakusoorpoq aammami qiianaqimmat. Taamaattumik aamma angallat kiveriaannaasoq anguarput. Angutit siulluillugit angallammut qaqitereeratsigit kingorna aamma angallataat qaqipparput. Kisianni tassa piffissaq kingullerpaaq atorlugu angutit annaappavut.
Kingorna angutit Ilulissanukaaneqarput.
-Nuannaaqaagut angutit marluk inuunerannik annaassigatta. Soqutaanngilaq ulloq unnuarlu aalisarnissaraluarput annaagatsigu, inuimmi inuunerannik annaassineq pingaarneruvoq, Jakup Eli Bech tulluusimaaqisoq oqarpoq.
