Kikkut naalakkersuisunngortitsissanersut nalonissutaavoq

Israelimi inatsisartunut qinersinermi ippassaq unnukkut naammassineqartumi arlalinnik ajugaasoqarfiuvoq, partiillu sorliit naalakkersuisunngortitsissanersut suli nalornissutigineqarpoq.
Allattoq Louise M. Kleemann
februaarip 11-at 2009 08:27

Israelimi nunanut allanut ministeri Tzipi Livni ullaaq oqarpoq, nammineq partiini Kadima qinersinermi ajugaasuusoq tamannalu unammillertaata Benjamin Netanyahup ataqqisariaqaraa naalakkersuisoqatigiinnillu pilersitseqataanissaanik kajumissaarlugu.

Netanyahu nammineq ajugaasutut suaaruteqarpoq naalakkersuisunillu nutaanik nammineq pilersitsiniarluni oqarsimalluni.

Israelimi inatsisartut 120-inik ilaasortaatitaqarput, qinersinermilu ippassaq ingerlanneqartumi partii Kadima 28-inik ilaasortaatitaqalerpoq Likud 27-inik ilaasortaatitaqalerluni . Ehud Barak-ip partiia sulisartut partiiat 13-inik ilaasortaatitaqalerpoq qinersinermilu ajorsartuulluni.

Israelimi inatsisartunut qinersinerup kingorna partiit mikinerusut arlaat sorleq naalakkersuisunngortitsinissamut tapersersuissanersoq apeqqutinngorpoq. Partii Inuiaassutsimik pingaartitsisoq Israel Beiteinu qinersinermi siuariarnerpaavoq inatsisartuni 15-inik ilaasortaatitaqalerami.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq