Kiisami tigusaraat
Nuummi Politiit qangali suliartik inaarsinnanngorpaat. Angut 31-nik ukiulik angummik 42-nik ukiulimmik apriilip qaammataata naanerani persuttaasimasutut politiinit tigummigallagassanngortinneqarpoq. Angutip persuttakkaminit ilisarineqarnera tigusarinninnermik kinguneqarpoq.
Allattoq Jens Thorin
Angutip 42-nik ukiullip inaani ernguttoqarnerani persuttaaneq pisimavoq. Persuttaareernermi aningaasat 3000 koruuninit angutip inaanit aamma tillinneqarput.
Persuttarneqartup persuttaasoq ilisarisimanngimmagu, pinerluttoq aallaqqaammut tigusarineqanngilaq. Kisianni 42-nik ukiullip persuttaasimasoq marlunngornerup siuliani ilisarimmagu, politiit suliartik naammassisinnaalerpaat.
Persuttaasimasoq sisamanngormat tigusarineqarpoq eqqartuussivimmilu tallimanngormat killisiorneqarluni, tillisimasutut persuttaasimasutullu pasineqarluni.