Kiinap præsidentia angerlaannartariaqalerpoq

Silap pissusaa pillugu isumaqatigiinniarnerit, Kiinap præsidentiata Hu Jintao-p, piffissaq kingulleq atorlugu G8-mi ataatsimeeqataasinnaajunnaarneranit akornusersorneqarput, taannami ullumikkut Kiinamut angerlaannartariaqalermat nunap ilaani Xinjiang-imi eqqissiviilliortoqalernera pissutigalugu.
Allattoq Elisa Isaksen
juulip 08-at 2009 10:59

Nunat angisuut nunarsuatsinni mingutsitsinerpaat 17-it 2050-iutinnagu gassinik silaannarmik kissakkiartortitsisunik affaannanngortitsiniarnertik taamaatissimavaat. Tamanna ataatsimeersuarnissamut nalunaarusiassatut missingersuummi, nutaarsiassaqartitsiviup Reutersip pissarsiarisimasaani atuarneqarsinnaavoq.

Nunarsuatsinni nunat pisuunerpaat G8-mik taaneqartartut Italiami illoqarfimmi L'Aquila-mi ataatsimiinnertik ullumi aallartissavaat. Tamatumunnga peqatigitillugu decembarimi silap pissusaa pillugu Københavnimi ataatsimeersuarnissamut piareersaataasumik ataatsimiittoqassaaq, tassanilu ataatsimiinnissami nunat pisuut 2050 nallertinnagu gassinik silaannarmik kissakkiartortitsisunik affaannanngortitsinissaat neriuutigineqaraluarpoq, aamma nunat 2050 tikitsinnagu silap kiassusaata agguaqatigiissillugu 2 gradit qaangernagit qaffariartitsinissannut pisussaaffilerneqarnissaat pineqaraluarpoq.

Nutaarsiassaqartitsiviup Reutersip missingersuusiaq pissarsiarisimasaa akuerineqassappat, anguniakkat taakku arlaannaalluunniit anguneqarnavianngilaq. Tamanna Danmarkip neriuutigisaatut G8-mi ataatsimiinnerup decembarimi Københavnimi silap pissusaa pillugu ataatsimeersuarnissami kinguneqarluartumik isumaqatigiissuteqarnissamut aqqutissiuussinissaanut naapertuutinngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq