KIIIN-ip sullissinera pitsanngoriaateqassaaq
Tamatuma kinguneranik naalakkersuisoqarfik minnerulersinneqassaaq, taamaattorli naalakkersuisoqarfiup naalakkersuinermut sullissinera pitsanngoriaateqassasoq oqaatigineqarluni.
Innuttaasunik sullissineq nukittorsarniarlugu aqutsisoqarfiit nutaat marluk pilersinneqassapput, ilinniartitaanermut aqutsisoqarfik, inuussutissarsiutitaarniarluni ilinniartitsinermik ingerlataqareersoq allillugu ilinniaqqinnerit, ilisimatusarneq, kulturi, sunngiffik ilagiillu ingerlatilissavai, taaneqarluni KIIA.
Ilinniagaqarnersiutinut immikkoortortaqarfik ilinniagaqartut ineqarnerisa isumaginnittoqarfianut ilanngunneqassaaq, taamaalilluni immikkoortortaqarfiup taassuma ilinniagaqartut najugaqarnerat aningaasatigullu isumagineqarnerat oqartussaaffigilissavaa, taannalu naalisarlugu taaguteqartinneqarluni ILA.
Innuttaasut pitsaanerusumik sullinneqarnissaat naalakkersuisunit siunertarineqartoq matumuuna KIIN-imit piviusunngortinneqarsinnaanera neriuutigineqarpoq.
Naalakkersuisoqarfiup aaqqissuussaanerata allanngortinneqarnera februaarip aallaqqaataanit aallartippoq, aatsaalli marsip aallaqqaataani tamakkiisumik piviusunngussasoq KIIN nittartakkamini taama allappoq.