Kigutit nakorsaat taartaajartortut akisoqaat
Nunatsinni kigutit nakorsaannut akissarsiassatut immikkoortitat 70 procentii taartaasartunut atorneqartarput. Tamanna Peqqissutsimut pisortaqarfimmit ingasagineqarpoq, tassami innuttaasut kigutigissuunissaanik suliniarnermut sunniuteqarnerlummata.
Kigutit nakorsaasa Danmarkimeersut nunatsinnut sivikinnerusumik sivisunerusumilluunniit taartaajartortarnerat kigutinik putulinnik ilaartuiffiuginnanngilaq, tassaalersimallunili aalajangersimasumik atorfiit inuttaqanngiffianni ilaartuutitut pinngitsoorneqarsinnaanngitsoq.
Demokraatit Peqqissutsimut Naalakkersuisumut Asii Chemnitz Narup-imut § 36-imik taasamik apeqquteqarneranni kisitsisit saqqummersut takutippaat, siorna 2005-imi 84-it taartaagallarsimasut, taakkulu pingajorarterutaat sapaatit akunneri tallimat inorlugit nunatsinniissimasut.
Ukiormanna 79-it taartaagallarnissaat naatsorsuutigineqareerpoq, taakkunannga 34-t sapaatit akunneri tallimat inorlugit sulissallutik.
Demokraatinit Jens B. Frederiksenip apeqquteqarami paaserusussimavaa kigutit nakorsaannut atatillugu aningaasaliissutit qanoq agguataarneqarsimanersut.
Peqqissutsimut Naalakkersuisup akissuteqaammini ilisimatitsissutigaa, 2005-imi kigutit nakorsaqarnermut aningaasaliissutit tamarmiusut 53 millioni koruuniusimasut. Kigutilli nakorsaannik atorfinitsitsiniartarnermik ajornartorsiuteqarneq pissutigalugu aningaasaliissutit 12 procentiisa missaat atorneqanngitsoorsimapput.
Tamaasa katikkaanni taartaagallartunut atorneqartut 2005-imi aningaasaliissutit 70,6 procenteraat.
Asii Chemnitz Narup isumaqarpoq, taartaagallartunik taaseraattuartunik amerlaqisunik atuisariaqarneq kigutigissaanermi anguniakkat anguneqarnissaannut kiisalu sulisut ulluinnarni toqqissisimanissaannut sulilluarnissaannullu pitsaanngitsumik sunniuteqartoq.
Nangillunilu oqaatigaa kigutit nakorsaat aalajangersimasumik atorfillit piumaneqarnerujuaannartut taamaammallu salliutinneqartuassallutik.
Namminersornerullutik Oqartussat aamma Dansk Tandlægeforeningip kigutit nakorsaasa aningaasarsiaat pillugit nutaamik isumaqatigiissusiaat, maanna nunatsinni kigutit nakorsaannut tusarniaassutigineqarpoq aggustimi septembarimiluunniit naammassissangatinneqarluni. Nunatsinni kigutit nakorsaattut atorfiit 30-it missaanniittut pingajorarterutaat inuttaqarput.
