Kigutit nakorsaannut isumaqatigiissut

Nunatsinni kigutit nakorsaasa atugaat ukiuni pingasuni pitsanngortinniarlugit Namminersornerullutik Oqartussanut isumaqatigiissut 820.500 koruuninik aningaasartalik ulluni kingullerni isumaqatigiissutigineqarpoq.

Danmarkimi kigutit nakorsaasa peqatigiiffiata aamma Kalaallit Nunaanni Naalakkersuisut akissarsiat pillugit ulluni pingasuni isumaqatigiinniarnitik ippassaq naammassivaat.

- Kigutit nakorsaatut atorfeqarnermi aningaasarsianut atugassarititanullu tunngatillugu, isumaqatigiissutip nutarsarnerani piuminarsaavugut immikkoortunillu erseqqissaalluta. Taamaalilluta siunissami atorfinitsitsiniartarneq, sulisullu pigiinnarnissaannik suliniuteqarnerunissaq, qulakkeerniarparput. Charlotte Prip, Danmarkimi kigutit nakorsaasa peqatigiiffianniit, aamma André Guttesen, Namminersornerullutik Oqartussat isumaqatigiinniartartuinit, nalunaarput.

Akissarsiat pillugit isumaqatigiissutaasut ilaasortanut maanna tusarniaassutigineqarput. Akuerineqassagunillu, kingumoortumik, apriilip aallaqqaataa 2006 aallarnerfigalugu, atuutilissapput.

Nunatsinni kigutit nakorsaasa pisortaat, Frank Senderowitch, oqarpoq, atorfiit 30-31-isut pingajorarterutaannaat maanna inuttaqartut. Atorfiillu sinnerisa taartaasartunik inuttalerniartarnerat ajornaatsuinnaasanngitsoq erseqqissaatigaa.