Kigutigissarluartarneq inuunermik annaassisinnaasoq
Ajornartorsiutillu nunatsinni aamma atuunnissaa ilimanarluinnarpoq.
- Utoqqaat sanngiitsut qarngup iluani bakteriiaqarpallaarnertik pissutigalugu puallulernissaminnut qaninnerujussuusarput. Taamaammat utoqqaat sanngiinnerpaat nammineerlutik kigutiminnik saliilluarsinnaanngitsut kigutiminnik paarsisarnerat pitsanngorsartariaqarparput, kigutit nakorsaasa pisortaat Børge Hede Politikenimut ullumi taama oqarpoq.
Kisitsisit aallaavigisai tassaapput, innuttaasut utoqqaat sanngiitsut puallullutik napparsimmavimmut unittartut tallimaagaangata ikinnerpaamik ataaseq toqusarmat. Peqatigisaanillu ilisimatuussutsikkut misissuinerit takutippaat kigutinik saliilluartarnikkut napparsimmavimmut uninnerit quliugaangata ataaseq pinngitsoortinneqarsinnaassagaluartoq.
Angerlarsimaffimmi ikiortit ilitsersorneqartartut
Utoqqaat pingasunik sisamararterutaat nammineerlutik kigutiminnik eqqiluisaartitsisinnaanngitsut Børge Hedep nalilerpaa. Taanna suliniummik ingerlataqarpoq, angerlarsimaffimmi ikiortit utoqqaat kigutigissartarnissaannik kiguleriffimmi ikiortinit ilinniartinneqartarnerannik suliaqartuulluni.
Københavnimi peqqinnissamut borgmesterip Ninna Thomsenip ajornartorsiutip atuunnera nassuerutigaa.
- Kigutinik eqqiluisaartitsinerup angerlarsimaffimmi ikiorteqarnermi aalajangersimasumik sammineqarnissaa sulisullu ilinniarteqqinneqartarnissaat isumagisariaqarparput, Ninna Thomsen Politikenimut oqarpoq.
