Kiffartuussinissamik isumaqatigiissutigineqartut Kommune Kujalliup ajorigai
Angallassinissanik taamaatitsisariaqarnerni kinguaattoornernilu uninngatitaanerup kimit akilerneqarnissaa pillugu kiffartuussinissamik isumaqatigiissutigineqartuni allassimasoqarnissaa kommunip ilaatigut ujartorpaa, aamma angallassisut assigiinngutsuugaluartut innuttaasut billetsinik ataasiinnarmit pisiffissaqarnissaanik piumasaqaateqarnissaq kiffartuussinissamik isumaqatigiissutini nutaani kommunip ilaasariaqarsoraa.
Borgmester Jørgen Wæver Johansen aamma inuussutissarsiornermut ataatsimiititaliap siulittaasua, Simon Simonsen, tusagassiorfinnut nalunaaruteqarlutik taama allapput.
Tamatumunngalu peqatigitillugu kiffartuussinissamik isumaqatigiissutit isumaqatigiinniutigineqarneri komminip akuutinneqarsimannginnera naammaginartinnagu naqissuserpaat.
Taamaammat tusagassiorfinnut nalunaarumminni kaammattuutigaat kommuni Namminersorlutillu Oqartussat piaartumik ataatsimiittariaqartut, kiffartuussinissamik isumaqatigiissutit kingunerisassaat aaqqiissutaasinnaasullu eqqartorlugit.
