Kielsenimut tatiginnikkunnaarluni taasiniarneq pinngitsoortileraat
Inatsisartut ukiaanerani ataatsiminnerata ulluani kingullermi Naalakkersuisut siulittaasuannut, Kim Kielsenimut, Partii Naleraq tatiginnikkunnaarnermik taasisitsinissamut siunnersuuteqarpoq.
Siunnersuuteqarneq pivoq suliffeqarnermut aatsitassanullu naalakkersuisup Erik Jensenip tunuarniuteqarneranut atatillugu oqallinneq aallarteqqammertoq.
Naalakkersuisut siulittaasuannut tatiginnikkuunnaarnermik taasititsinissamut Partii Naleqqap siulittaasua Hans Enoksen saqqummiivoq. Taannalu Inatsisartoqatiminut kaammattuuteqarpoq:
- Nunatsinni naalakkersuinikkut ingerlatsineq pitsaanngilaq. Inuit inuuniarnikkut atugaat aningaasaqarniarnerallu sakkortuumik Naalakkersuisunit pilliutigineqarput, Hans Enoksen Inatsisartut oqaluttarfiannit taasitsisoqannginnerani taama oqarpoq.
AAMMA ATUARUK Tusagassiuutit: Erik Jensen naalakkersuisuujunnaalerpoq
- Isertuussilluni matoqqasumik aqutsineq ulluinnarsiutaalerpoq, Hans Enoksen Inatsisartut oqaluttarfiannit oqarpoq.
- Naqissusiisoqartariaqarpoq nunarput inuilu pillugit imaannaanngitsumik naalakkersuinikkut killiffeqalernerput innuttaasut kissaatigerpasinngisaat Inatsisartuniit ilumut kissaatigineqarsimanersoq, Hans Enoksen oqarpoq.
Tatiginnikkunnaarlunili taasisitsiniarnerigaluaq Naalakkersuisooqatigiit Siumumeersut aamma Nunatta Qitornaaneersut, Naalakkersuisooqatigiinnut partii tapersersortaasoq, Demokraatit, peqatigalugit pinngitsoortippaat.
