Kielsen taaguunnikkinnerpaavoq: Aperinianngilakka sooq qininngilisinga
Erik Jensen Siumumi siulittaasutut qinigaaqqippoq.
Siumup nuna tamakkerlugu Qasigiannguani ataatsimeersuarnerani ippassaq tamanna aalajangerneqarpoq, taannalu taasisunit 68-init 39-nit taaguunneqarluni.
Unammillertai taama taaguunneqartigiinngillat. Aki-Matilda Høegh-Dam Folketingimi ilaasortaasoq 16-init taaguunneqarpoq. Politikeritoqarlu 13-init taaguunneqarluni.
- Sassarnerma tunngavia tassaavoq immikkoortortaqarfinnit kaammattorneqarnikuunera. Aamma normu 2-nngortitaanera tuppallernareqaara, siunissamullu neriuuteqarluarlunga, Aki-Matilda Høegh-Dam KNR-imut oqarpoq.
Qanoq ippit?
- Ajunngilanga.
Erik Jensen suleqatigisinnaasutut nalilerpiuk?
- Erimmik suleqateqarneq misigereernikuuarput. Uani immaqa pingaarneruvoq, anguniakkagut massakkut ataatsimeersuarnitsinni aalajangersorneqarput, sukaterneqarlutik erseqqissarneqarlutillu. Taakkualu ingerlateqqinneqarnissaat piviusunngortinneqarnissaallu pissanganartorujussuussaaq, taanna oqarpoq.
Kielsen: Sooq toqqannginneraannga apererusunngilanga
Kim Kielsen siulittaasunngorniuunnermi taaguunnikinnerpaalluni 13-init taaguunneqarpoq.
Taanna Siumumi Aleqa Hammondip kingorna 2014-imit 2020-mut siulittaasuuvoq. Taannalu partiip kingullermik nuna tamakkerlugu 2020-mi novembarimi ataatsimeersuarnerani Erik Jensenimut aatsaat ajorsarluni.
Kim Kielsen 2014-imit 2021-mut naalakkersuisunut aamma siulittaasuuvoq. Taamaammat siulittaasunngorniuunnermi taaguunnikinnerpaaq politikeritoqaavoq.
Taanna Inatsisartunut ullumikkut siulittaasuuvoq, Kielsenili ajornarnerata kingunitsianngua KNR-imit naapikkatsigu qungujulavoq.
Kim Kielsen qanoq ippit?
- Uanga ajunngilanga. Siumut siulittaasortaarpoq. Siulittaasoq ingerlaqqippoq.
Ullumikkut sassaravit qanoq ippa?
- Ajunngilaq. Ajorinngilara.
Sooq isumaqarpit taama inerneqartoq?
- Maani ataatsimeersuartut isummerput. Uanga ataqqivakka isummernerat. Aperinianngilakka sooq qininngilisinga. Ataqqivakka.
Siulittaasunngortoq suleqatiginissaanut piareersimavit?
- Suleqatigisuaannarpakka, kinaluunniit Siumumiikkaluarpat, siulittaasuugaluarpallu.
Suleqatigeqqinnissaanut piareerpit?
- Naatsorsuutigineqassaat, uanga Siumup siulittaasuanik siulersuisuinillu suleqatigiuartarikka. Takinerunngilaq. Aamma avissaartuunnermik oqariartuutigineqassanngilaq.
