Kertemindemi puisi periarfeerukkaat

Puisit ilaat - Sigguttooq - ataatsimik ukioqartoq, qatanngutini ukiunik marlunnik angajulleq Kertemindemi Syddansk marinbiologiske forskningscenterimit - tassa imaani uumassusilinnik misissuisoqarfimmit - ippassaq qimaasoorutigineqartoq timmisartumik, angallatinik marlunnik biilimillu ataatsimik maanna ujaarineqarpoq.
Allattoq Niels Krogh Søndergaard, Simon Uldum
apriilip 03-at 2014 05:59

Ippassaq ulloq naallugu ujaasisoqarpoq, puisillu aappaa kisiat nassaarineqarluni. Sigguttoorli arnaviaq Luna suli nassaarineqanngilaq, puisilu pineqartoq immikkuullarissutut oqaatigisarisaqartoq, aviisi Fyens Stiftstidende taama allaaserisaqarpoq.
 
- Nassaarinngikkutsigu annertuumik annaasaqassaagut, SDU-p Uumassusilinnik misissuisoqarfiani suliniutinik aqutsisoq lektoriusorlu, Magnus Wahlberg, aviisimut taama oqarpoq.

Luna 59 kiilunik oqimaassuseqarpoq qatanngutaalu angutiviaq Nino 110 kiilunik oqimaassuseqarluni. Sigguttuut immap iluani tusaaniartarnerisa ilisimatusarfigineqarnerani qitiulluinnartuupput. Ilisimatusarnermi paasisat imaani anorisaatinik ikkussuinissamut atorneqartussaapput.

Ilisimatusarneq siorna decembarip arfineq-pingajuani aallartippoq, puisillu Madridimi uumasuusivissuarmit Kertemindeliaanneqarsimallutik.

Ujaasineq ippassaq unnukkut unitsikkallarneqarpoq ullumikkullu aallarteqqinneqarluni, nassaaripallannissaalu neriuutigineqarpoq.

- Tallimanngorpaatinnagu nassaarinngikkutsigu kingorna nassaarinavianngilarput, Kirstin Anderson Hansen taama isumaqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq