Kenyamiut naalagiarrapput

Kenyami politikkikkut ajornartorsiornerujussuaq aaqqiiviginiarlugu nunarsuaq tamakkerlugu isumaqatigiissitsiniartartut ilungersuleruttortut, kenyamiut politikki qimalaarlugu ullumi naalagiarput, eqqissineqarnissaanillu qinnuteqarput.
januaarip 06-at 2008 13:36

-Siuttutta sumiginnarpaatigut. Ajunaarnersuaqartitsipput. Kenya annaateqqullugu ajugaqanngitsumut maanna qinuvugut, kenyamiu naalagiaqataasoq, jane Riungu nutaarsiassaqartitsivimmut oqarpoq.

Kenyami qinersinermut ataatsimiititaliarsuup sapaatip akunnerata ataatsip matuma siorna nalunaarutigaat, maanna præsidentiusoq, Mwai Kibaki, præsidentingorniunnermi ajugaasoq, kisianni Kibaki illuatungiliuttullu præsidentimut qineqqusaartitaat, Raila Odinga, manna tikillugu suli attaveqanngillat.

Odinga isumaqarpoq Kibakip ajugaanera pissusissamisunngitsoq, taassumalu ajugaaner pissutigalugu Kenyami politikkikkut eqqissiviilliortoqarujussualersoq. Kenya Tuluit Nunaannut atajunnaarmalli aatsaat taama eqqissiviilliortoqartigaaq.

Eqqissiviilliortoqarnerani inuit 360-it missaat maannamut toqutaareerput.

Isumaqatigiissitsiniartartut nunani allaneersut, ilaatigut Nobelip nersornaasiuttagaanik nersornaatisisimasoq, sydafrikamiu Desmond Tutu, eqqissinissamik maanna suliniuteqarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq