Kenyami ulluni pingasuni akerliussutsimik takutitserusupput

Illoqarfinni arlalinni perulluliortoqaqqinnerani politiit gassi qulliliornartoq atortariaqarsimavaat.

Illoqarfimmi Kisumumi ullumi akerliussutsimik takutitsisut eqqissineqarnissaa piumasaralugu suaartarput eqqissineqarnissaanillu piumasaqarnertik takutinniarlugu orpiup avalequtaanik tigummiarlutik. Akerliussutsimilli takutitsineq perulluliornertaqanngitsuunngilaq politiillu gassimik qulliliornartumik inuit akornannut igeriusseqattaarput. Kenyamiorpassuit præsident Kibakip tunuarnissaa piumasaraat, qinersisoqarmat pinerluuteqarluni imminut ajugaatissimanerarlugu, massa illuatungiliuttoq Ayla Odinga qinerneqarnerugaluartoq. Akerliussutsimik takutitsisut ilaata nunap iluani sorsuuttoqarnissaa piumasarinagu naqissuserpaa.

Illoqarfinni arlalinni akerliussutsimik takutitsisoqarpoq, soorlu Mombasami aamma politiit gassi qulliliornartoq atortariaqarsimavaat. Illoqarfiit pingaarnersaanni, Nairobimi inuit ikittuinnaat katersuuttarsimapput, tamaanili aamma katersuunniartut politiinit avissaartinneqartarsimapput. Naalakkersuisut akerliussutsimik takutitsinerit inerteqqutigaat. Naalakkersuisunut illuatungiliuttut ippassaq qiimmaallapput inatsisartunut siulittaasungortitsigamik. Illuatungiliuttut siulittaasuata, Odingap oqaaseqartartua oqarpoq Kibakip imminut præsidentinngortinnera Kenyamiut akuerinavianngikkaat. Nunanit allaniit illuatungeriinnik isumaqatigiissitsiniartoqartaraluartoq suli iluatsittoqanngilaq. Naalagaaffiit Peqatigiit qullersarisimasaat, Kofi Anan, isumaqatigiissitsiniarluni ullumi tikittussaagaluarami, napparsimalersimagami kinguartitsiinnarallarpoq.