Kenneth Høegh: Naatitanik naatitsisariaqarpugut

Nunatsinni ullumikkornit annerusumik naatitanik naatitsisariaqarpugut.

Taama isumaqarpoq Upernaviarsummi nunalerinermut siunnersortaaneq, Kenneth Høegh, Islandimik maligassatut isiginnittoq.

Aamma taanna taperserneqarpoq Islandimiut nunalerinermik ingerlataqartut kattuffiini pisortamit, isumaqartumit nammineerluni naatitanik naatitsisarneq pitsaaquterpassuaqartoq.

Ullumikkornit annerusumik Kalaallit Nunaanni naatinneqarsinnaagaluarput tomatit, agurkit salaatillu amerlanerusut.

Taama isumaqarpoq Kenneth Høegh Upernaviarsummi nunalerinermik ingerlatsivimmi siunnersortaaneq.

Taanna isumaqarpoq nunarput Islanditut periarfissarissaartigisoq.

Kenneth Høegh-ip nunatsinni naatitanik naatitsisalersinnaaneq ilimanaateqarluartutut isigaa tamannalu piviusorsiortuunerarlugu.

Sigurgeir Thorgeirsson Islandimiut nunalerimut kattuffiini pisortaavoq nunatsinnilu nunalerineq pillugu siunnersuisoqatigiinni ilaasortaalluni.

Taanna isumaqarpoq periarfissaqarpat naatitat pingaartinnerusariaqarivut:

Islandimi naasorissaasut peqatigiiffiata pisortaat, Sigurgeir Thorgeirsson, Kalaallit Nunaanni nunatsinni pissutsit naluai akisuallaanngitsumilli naatitsisinnaasuugutta naatitsisariaqarsoraatigut.

- Naatitsineq eqqusuussinermit akikinnerusinnaappat pitsaanerussaaq naatitsinissat.

Nammineq naatitsineq iluaqutissarpassuaqarpoq.

- Suliffiit amerlanerusut naatitallu nutaanerusut naatitsinermi pissarsiarineqarsinnaapput. Nammineq naatitsineq akiliifigissalugu atuisartut soqutiginnissorai.

- Tomatit Islandip avataani naatsinneqartuninngarnit akisunerulaaraluartut pilerineqarnerusarput. Kalaallit Nunaanni taamaalinissaq aamma ilimagivara, Sigurgeir Thorgeirsson oqarpoq.

Sigurgeir Thorgeirssonip ilanngullugu oqaatigaa naatitanik nammineerluni naatitsinikkut naatitat sunik seqqitsarneqartarnerat nakkutigineqarsinnaanerusoq.

Nunatsinni naatitanik naatitsinerusalernissamut isummat amerlanerusut ualimut Nunarput Ullumi aallakaatinneqalerpat tusarsinnaavatit.