Kenneth Høegh isumaqarpoq nunatsinni immuleriffeqalertariaqartoq

Danmarkimiit nersussuit immuinik nunatsinnut eqqussuineq akisuallaaqaaq. Taamaattumik nunatsinni savaatillit namminneq immuleriffeeqqanik peqartariaqaraluarput, Upernaviarsummi nunalerineq pillugu misileraavimmi siunnersortaaneq, Kenneth Høegh oqarpoq.

Taamatut oqarnera Islandimi nunaatillit kattuffiisa pisortaanit nunatsinni nunalerinermik siunnersuisooqatigiinni aamma ilaasortaasumit taperserneqarpoq. Nunatsinni nersussuit immui atorluarneqartariaqartut taassuma oqaatigaa.

Nersussuit immuiarneqarsinnaasut nunatsinniittut amerlanerusariaqarput. Danmarkimi nersussuit immui asiuinaveersaasikkat akisuut pisiarinagit nunatsinni nersussuit immuiarneqarsimasut immui pisiarisariaqarpavut, Upernaviarsummi nunalerineq pillugu siunnersuisoqarfimmi siunnersortaaneq Kenneth Høegh taama isumaqarpoq.

Aporfiusinnaasut suulluunniit taassuma ajugaaffigineqarsinnaasorai.

Immuleriffiit nunani allanisulli eqiterunneqaratik paarlattuanik savaateqarfiit ataasiakkaat immikkut tamarmik immuleriffeqarnissaat anguniarneqassasoq, Kenneth Høegh oqarpoq.

Taanna immuleriffimmik misiliutaasussamik maanna sanatitsivoq. Taassuma isumassarsiaa Islandimi nunaatillit kattuffiisa pisortaanit, nunatsinni nunalerinermik siunnersuisooqatigiinni aamma ilaasortaasumit taperserneqarpoq.

- Immunnik eqqussuussinermit akikinnerussanersoq misilittariaqarpoq. Taamaattorli akikinnerpaaffiliisoqartariaqassaaq, Sigurgeir Thorgeirsson oqarpoq.

Taassuma paasisai naapertorlugit nunatsinni nersussuit immuinik tunisassiorneq iluaqutaassaaq.