Erinarsortartoq Kelly Fraser 26-nik ukioqarluni toquvoq
Kelly Fraser 26-inik ukioqarluni toqukkut qimaguppoq. Nutaarsiassaqartitsivik CBC News taama allaaserisaqarpoq. Kelly Fraser Igloolimmi inunngorpoq Sanikluarli Nunavummiittoq angerlarsimaffittut isigaa.
Erinarsortartup nuuteeraliaa nunap inoqqaavisa nipilersuusiaanni nersornaasiisartunit siorna innersuunneqarpoq. Kelly Fraserip erinarsortarnermi saniatigut naggueqatigiit inuit inuusuttortaanut torlorsortarneq siuarsaaqataaffigaa. Tusaamaneqarninilu aqqutigalugu nunap inooqqaavisa pisinnaatitaaffii siuarsaaqataaffigai.
Nunasiaataanerup kingunerisaanik naggueqatigiinnut inuit pinngitsaalillugit nuutsinneqarsimanerannik kingunerluutit isornartorsiortuuvai. Nerisassanik pilersuineq, imminut toqunnerit amerlavallaarneri Nunavummilu inuuniarnerup akisuallaarnera pisortanut isornartorsiuutigisarlugu.
CBC erinarsortartoq pillugu filmeeraliaa uani takujuk:
Inuusuttuaraalluni tusaamasanngortoq
Kelly Fraser aqqanilinnik ukioqarluni kitaarertalerpoq, 19-inillu ukioqarluni Rihannap atugaa Diamond inuktitut taallalerlugu YouTubemi saqqummersimmersinnera tusaamasaassutiginerlugu.
Nuuteeraliani siulleq "isuma" 2014-inimi saquummersippaa, nuuteeraliaatalu aappaa "Sedna" 2017-imi saqqummerluni. Taanna nunap inoqqaavisa nipilersuusiaannut nersornaaserneqarnissaanut Juno Awardsimut innersuunneqarpoq.
Kelly Fraser nunap inoqqaavinut naggueqatigiinnut inunnut Metísinullu maligassiuilluartutut ukioq manna nersornaaserneqarpoq.
Erinarsortartoq Manitobami toquvoq, sunali toqqutigineraa avammut nalunaarutigineqanngilaq. Nutaarsiassaqartitsiviup CBC Newsip ilaqutaasut attaveqarfigisimagaluarpai, taakkuli attaveqarfigineqarnissartik kissaatigisimanngilaat.
Kelly Fraser eqqaaniarlugu Nuup ilaani Nuutoqqami ullumi naapittoqassaaq tussiaqatigiittoqarlunilu.
Kelly Fraserip inuktitut Diamonds atoraa uani takusinnaavat:
