Katuaq ukiunik 20-nngortorsiortoq

Sinerissami angalatitsisoqassaaq, saqqummersitsisoqassalluni, atuakkanik saqqummersitsisoqassalluni, meeqqanullu isiginnaartitsisoqassalluni, quiasaarisoqassallunilu, aaqqissuussallu tamakku ukioq naallugu misigineqarsinnaassapput. Katuaq tusagassiuutinut taama nalunaaruteqarpoq.

Katuami pisussat nalunaaqutaq aqqanermut tanneq pingasunut, 10:15, aallartissapput, Hinnarik Kammanilu ilaatigut aliikkusersuissallutik. Meeqqanut safteqassaaq, kaffi tiilu, kaageqassallunilu, Katrinalu Junior Wowowimeersoq allallu aamma aliikkusersuissallutik.

Katuap siulersuisuini siulittaasoq Uju Petersen, Katuallu pisortaa Julia Pars ataatsimut tanneq qulingiluanut, 13:45, oqalugiassallutik, Kommuneqarfik Sermersuullu borgmesteria Asii Chemnitz Narup nalunaaqutaq pingasunut oqalugiassalluni.

Akornatigut Åh Abe tusarnaartitsisassaaq, soorlu aamma Ulf Fleischer aamma Eigil Petersen tusarnaartitsissasut.

NAIP nalunaaqutaq sisamat qaangilaarneranni aliikkusersuissapput, isiginnaagassiarlu Nalusuunerup Taarnerani Inersuaq Hans Lyngemi isiginnaarneqarsinnaassalluni.

Kalaallit Nunaat pillugu filmiliat, Kalaallit Nunaannilu filmiliat, soorlu Frøken Smillas Fornemmelse for Sne, Qaamarngup uummataa, Sume - Mumisitsinerup nipaa, Qaqqat Alanngui allallu, Katuami ukiup ingerlanerani takutinneqarumaarput.

Julia Pars, Katuami ukiuni qulini pisortaq ima oqarpoq:

- Ukiuni 20-ni kulturikkut suliaqreernitsinni kingumut qiviarluni tulluusimaarnermik, nuannaarnermik qujamasunnermillu aaqqissuussarpassuit ajukkunnanngitsut ataatsimoorluta pilersittarsimagatsigit nuannaarutigaara. Kulturip illorsuatut anguniakkatta annersaraat piorsarsimassutsikkut siammasissumik suleqateqartarnissaq, tamannalu isumaqarpunga naammassisaripput, Julia Pars oqarpoq.

Nalliuttorsiornerit naggaserlugit unnukkut nalunaaqutaq qulinut qummoroortarnersuaqassaaq.