Katuap aasaanerani tusanaartitsineranut ulikkaarussaasorpassuit
Tallimanngormat, Inuiattut ullorsiornitsinni, illoqarfimmi nipilersortorpassuaqarpoq, nipilersoqatigiillu ukiormanna naapisimaanerani peqataasut illoqarfimmi sumiiffinni assigiinngitsuni aamma aliikkusersuipput. Arfininngormat kangerlummi nunaqarfinni tusarnaartitsisoqarpoq, sapaatiummallu ileqquusumik aasaanerani tusarnaartitsinermik sapaatit akunnerata naanera naggaserneqarluni.
Kalaallit allamiullu erinniugaannik erinniarsuarnik, rockinik poppinillu nipilersortoqarpoq. Tusarnaartitsineq mediteriissummik 'Qilaammik' aallarnerneqarpoq, kingornalu nipilersugassiaq 'Ilulissat' aamma tusanaartitsissutigineqarluni, taakku marluk Arnannguaq Gerstrømimit erinniarineqarput.
Ron Davis Alvarez Venezuelami ’El Sistema’-meersoq nipilersugassiami 'Anaanami' pulaartitut ilitsersuisuuvoq, erinarsugassiaq taanna filmimit 'Inummeersuuvoq' Uummannamilu meeqqanut pigitinneqarluni. Ron Ummannami Meeqqat angerlarsimaffiannit Nuummi Meeqqat illuannit agiartartut Nipilersortartut naapisimaaneranni peqataaqatigai. Nipilersornermik Ilinniarfik aamma Uummannaq Music qanittumik suleqatigiipput, Nipilersornermillu Ilinniarfik Uummannami Nalliuttorsiornermut qaammatip tulliani ingerlanneqartussamut peqataasussaalluni.
Tambourkorpsip meerartai pikkorissut ilaatigut Qaqqat akornanni qooqqutigut klassiskimik, marchimik, rockimik salsamillu appisimaarpaat. Nuuk Byorkester aamma pikkorilluinnartumik nipilersorput.
Qupannavaat erinarsortartumit Sverigemeersumit Sofi Ekimit siulersorneqartut tusarnerluinnartumik erinarsorput tusanaartitsinerlu pikkunarnerulersiinnarlugu. Erinarsortartut inuusuttut Mike Fencker Thomsen peqatigalugu Bohemian Rhapsody erinarsorpaat, taannalumi ilisarititsisartutut tusanaartitsineq kusanartumik qungujunnartumillu ingerlallugu.
Tusarnaartitsinq konfettinik erfalasunillu naggaserneqarpoq, tusarnaariat qittapput nipersortartullu peqataasut tamarmik Gangnam Style kalaallisut erinarsorlugu, ilaatigut oqaatsit ’Greenland Style’ aamma ’Ataatsimoorneq’ atorlugit.
1) Kommuneqarfik Sermersooq
2) Kelvin Bonde
3) Kommuneqarfik Sermersooq
4) Kommuneqarfik Sermersooq
5) Kommuneqarfik Sermersooq
6) Katuaq
7) Katuaq
8) Kommuneqarfik Sermersooq
9) Kelvin Bonde
10) Katuaq
