Katuami tulugarpalaaq

Timmiaq qernarik tuluguaq issittumi asaneqarlunilu inuuluugineqartarpoq. Taakkuli inuttulli nunarsuarmi ukiuni makkunani allanngornerpassuarnit aamma eqqorneqarput. Tamannaavorlu isiginnaagassiap 'Tulugaq'p qiterisaa.

- Sunnerneqarsimapput ullumikkut inooriatsimit, mingutitsinernik, silap allanngorneranik, imaani pissutsinik, inunngornernik, toqumit, tikeraartinit, ilaquttanik, nipilersornernik kiisalu misigisutsikkut sunnerneqarsimanerminnik avatangiisinik pinngortitamillu soorlu inuit aamma taamaattut, isiginnaagassiaq 'Tulugaq' pillugu Katuaq nalunaarumini taama allappoq.

Isiginnaartitsisartut Nunatsinneersut, Nunavimmeersut aamma Nunavumeersut ataatsimoorlutik isiginnaagassiamik sanapput. Naggueqatigiillumi inuit oqaluttuatoqaanni oqalualaavinilu tulugaq assigiinngitsutitigut ilaasarpoq.

- Eqqumiitsuliortuunikkut pingaaruteqarluinnartumik inuiaqatigiit akornanni pisussaaffeqarpugut pingaaruteqarluinnartumik, nunatta akornanni oqaluttuagut avitseqatigiiffigissallugit isiginnaartitsinikkut oqariartuutivut nunarsuatta sinneranut siaruassallugit kinaassuserput paasitinniarlugu, Katuaq nalunaarpoq.

Isiginnaagassiaq 'Tuluguaq' unnugu takutinneqassaq Katuami Hans Lyngep inersuani nalunaaqutaq 20.00 aqagulu nalunaaqutaq 15.00.