Katuami kitaarissamaaleqaat

Marlunngornermi pingasunngornermilu Katuami kitaarillaqqissut appisimaalerput. Unnugu erinniarsuarpalaartumik nipilersoriaaseq atorneqassaq nunani avannarlerni pikkorinnerit ilaat appisimaartoralugit. Aqagulu Shu Bi Duakkut kitaarertuat Ole Kibsgaard rockerpalaartumik appisimaarniarpoq.
Allattoq Noah Mølgaard
maajip 22-at 2012 14:37

Islandimiu kitaarertartoq Svanur Vilbergsson nipilersoqataalu Mikkel Andersen erinniarsuarpalaartumik kitaarerlutik unnugu Katuap inersuaaraani appisimaarniarput.

- Nuumeereernikuuvuna periarfissinneqarlungalu nipilersornermik ilinniarfimmi ilinniartitsillungalu tusarnaartitsinissamut. Naaggaarnissaq ajornakusoortorujuuvoq Kalaallit Nunaat nuannareqigakku. Ilisimasakka nipilersornermi ilinniartunut inuusuttunut ingerlateqqerusuppakka assullu nuannaarutigalugu unnugu Svanur Vilbergssonip appisimaaqatiginissaa, Mikkel Andersen erinniarsuarpalaartumik Danmarkimi kitaarertartut kakkannerit ilaat oqarpoq.

Aamma Ole Kibsgaard pingasunngornermi allanik ilaqarluni appisimaartussaq arlalinnik peqquteqarluni nunatsinniippoq. Pisussaq pingaarneq tassaavoq sapaatip akunnera tulleq Upernavimmi meeqqat peqatigalugit tusarnaartitsinissaa iluatsillugulu Katuami kitaarertoqarneranut peqataajartorpoq.

- 2012ip annersaa Red Barnet suleqatigalugu meeqqat inuusuttullu Upernavimmi Qaanaami Red Barnet-ip ornigaliaanik atuisut cd-lioqatigaakka. Upernavimmi maajip 30-at tusarnaartitsissaagut, tamannalu iluatsillugu kitaarerluni festivalip peqataaffigisinnaanera iluatsippara, Ole Kibsgaard oqarpoq kitaarillaqqinnermi saniatigut Danmarks Radiomi tv-kkut meeqqanut aallakaatitassiami Kaj og Andreami ilisimaneqarluartoq,

Tusarnaartitsinerit tamarmi nalunaaqutaq 19.30 aallartissapput isernerlu akeqanngilaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq