Katuami Filmertarfik ukiunik qulinngortorsiorpoq

Katuami Filmertarfik ukiunik qulinngortorsiorluni ullumikkut nalliuttorsiorpoq, tamannalu pissutigalugu ullumikkut filmeriartut tamarmik popcorninik akeqanngitsumik tunineqassapput, billitsinik ullumikkut atortunik takutitsinikkut. Ukiunik qulinngortorsiornermut atatillugu filminik nutaanngitsunik takutitsisoqartassaaq, soorlu takutinneqarumaarlutik “Qaamarngup uummataa” aamma “Frøken Smillas Fornemmelse For Sne”. Filmi kingullertut taaneqartoq Katuap Filmertarfiani siullerpaatut takutinneqarpoq. Katuami Filmertarfik Europami filmertarfissuit allat assigalugit filminut takutitseqqaartarfiuvoq, tassa filmiliarsuit, soorlu Københavnimi takuteqqaarneqartut assigalugit, Katuami takuteqqaarneqarsinnaapput.