Katuami erinarsuusiornermik pikkorissaasoqalersoq
Kulturikkut illorsuarmi Katuami aggustip 13-iani 14-ianilu erinarsuusiornermik workshoppertitsisoqalerpoq, erinarsuusiortartullu Tobias Trier aamma Inunnguaq Petrussen misilittakkaminnik oqaluttuassapput peqataasullu kalaallisut, danskisut tuluttullu erinarsuutinik nutaanik suliaqarnermik ilitsersuissallutik, Katuaq tusagassiorfinnut nalunaaruteqarluni taama allappoq.
Ilitsersuisussallu misilittagartuujupput.
Tobias Trier arfinilinnik nuusiaqarpoq, ilaatigullu Steffen Brandt, Tina Dickow aamma Allan Olsen nipilersoqatigisarsimallugit. Inunnguaq Petrussen marlunnik nuuteeraliaqarpoq, kingulleq nipilersoqatigiit nuannarineqarluartut Inuk peqatigalugit 2015-imi saqqummersitaralugu aammalu nipilersoqatigiinni Aalukkunni kitaarertuulluni.
Taakku marluk erinarsuusiortartunik ilisarisimaneqarluartunik ataataqarput, tassalu Iisaavaraq Petrussen aamma Røde Morimi erinarsortartoq Troels Trier. Taamaammat taalliorluni oqaluttuanik nuannersunik qanoq suliaqartoqarsinnaaneranik siunnersuutissatsialaateqassagunavipput.
Inuit qulit peqataasinnaapput, peqataanerlu akeqasaanngilaq. Peqataarusuttut kingusinnerpaamik pingasunngorpat Katuamut nalunaareersimassapput.
