Kattussuuttoqarpat qarasaasianut sullissineq

Kommunit kattussuunnissaat ulluni qaninnerni pinavianngikkaluartoq, kattussuunnissamut piareersaatit aallartinneqareerput. Ole Kielmann KIT A/S-imi pisortaq ima oqarpoq.

- KIT A/S-ip suliarisartagaanut ilaavoq kommuninut qarasaariaqarnikkut siunnersuisarneq, maannakkorpiarlu kommuninit pingaartinneqartunut ilaasoq tassaavoq kommunit kattussuutsinneqarnissaat. Taamaammat qarasaasiaq atorlugu kommunit suleqatigiissinnaanerannut siunniunneqarsimasut angunissaat pinerullugu periarfissanik misissuineq ingerlavoq.

Qarasaasiaq atorlugu sullissinermi suleriaatsinik allannguisinnaaneq periarfissaqarpoq. Taamaattoqassappallu kommunini sulisut sulisitsisullu suleqataalluinnarnissaat pisariaqarpoq, Ole Kielmann oqarpoq nangillunilu; - Qarasaasiaq atornerullugu sullissineq ingerlanneqalerpat, innuttaasut sullinneqarnerat pitsanngoriarsinnaavoq, ilaatigut sullissineq sukkanerusumik ingerlalersinnaavoq, assersuutigalugu teknikkeqarnermut tunngasuni sullissinermi soorlu illuliorfissanik qinnuteqartarnermi utaqqisarneq sivikinnerulersinneqarsinnaavoq.

Suliffeqarfinni allannguisoqalersillugu sulisut toqqissisimavallaarunnaartarput, tamannalu KIT AS-imeersut maluguniartarpaat.

- Sumiluunniit suliffeqarfimmi allannguisoqalersillugu toqqissisimajunnaarneq misigineqartarpoq, tamannalu aamma uagut malugisarparput, Ole Kielmann oqarpoq nangilunilu: - Naluneq ajorparput suna pigalugu, sunali pigilersinnaanerlugu nalusarparput. Toqqissisimajunnaarneq sulisut akornanniinnaq pineq ajorpoq, aamma sulisitsisut allannguisoqalersillugu toqqissisimajunnaartarput.