Kattussuunnissaq pillugu ataatsimiipput
Akileraarutip qaffannissaa, kiffartuussinerup pitsaassusaa agguaqatigiissoq minnerpaaffimminiittorluunniit, sanaartugassat suut salliutinneqarnissaat, tamakkuupput kujataani kommunerujussuanngornissaq pillugu ippassaq ataatsimiinnermi eqqartorneqartut.
Eqimattat arfiniliusut saqqummiussineranni oqariartuutit assiigiiaakannerput.
Kommunerujussuanngortussap aningaasatigut patajaatsumik ingerlanissaa eqqarsaatigalugu ilaatigut akilaarutit naligiitineqalerlutik 45 procentinngortinneqarnissaat siunnersuutigineqarluni.
Innuttaasunik kiffartuussinerup ajorseriannginnissaa anguniarlugu, kiffartuussinerup minnerpaaffimminiinnginnissaa amerlanernit siunnersuutigineqarpoq. Eqimattalli ataatsip saqqummiussinermini pingaartippaa illoqarfiit assigiinngissuteqarnerat aamma naliliiniarnermi apeqqutaatinneqartassasoq.
Inissialiortiternerit, innarluutilinnut utoqqarnullu inissiat naleqquttut, aqqusinernik aserfallatsaaliineq, angallannikkut atukkat pitsanngorsaavigineqarnissaat, ikuallaaveqarneq, ilaatigut tamakkuupput kujataani kommunerujussuanngortussami sulissutigisassasut amerlanernit saqqummiunneqartut.
Ullumikkullu ataatsimiinnerup ulluani kingullermi, kujataani attaveqaatit Air Greenlandillu angallassineranut siunnersuutit, kiisalu ingerlatsinerup ilusissaanik politikkikkut aqutsisoqatigiit siunnersuutaat oqaluuserineqassapput.
