Kattusseqatigiit:Aalisartut piniartullu peqataatinneqartariaqaraluarput

Ataatsimeersuarnermi, Nunanit Avannarlerniit EU-miillu peqataaffigineqartumi, silap pissusaata allanngoriartornera issittormiunut qanoq sunniuteqarnersoq oqaluuserisassaminnut qulequtaraat.

Kattusseqatigiit Partiiat isumaqarpoq ataatsimeersuarnermi ulluinnarni eqqorneqartut; aalisartut piniartullu peqataatinneqarnissaat naalakkersuisut piumasarisariaqarsimagaluaraat. Taamaammat Kattusseqatigiit Partiiata siulittaasua, Anthon Frederiksen naalakkersuisunut assigiinngitsunik apeqquteqarpoq.

-Ataatsimeersuarnerup aallartinnera tikillugu KNAPK-lluunniit peqataatitaqarnissaa neriuutigisimagaluarparput, taakkuummatami ulluinnarni allannguutinik maluginnittartut, ministerinullu pissusiviusut aallaavigalugit misilittakkaminnik oqaluttuarsinnaasut. Aalisartut piniartullu peqataatinneqannginnerat ajuusaarnarpoq, taamaalilluniaasiit nunap inuiisa isumaat tusarniarneqanngillat, Anthon Frederiksen isornartorsiuinerminut tunngavilersuummini allappoq.