Oqaluttuarisaanitsinni isumaqatigiissut pingaaruteqartoq Narsami ippassaq atsioqatigiissutigineqarpoq. Tassalu maajip aallaqqaataani 2009–mi Narsap, Qaqortup Nanortallillu kattunnissaannik isumaqatigiissut.
Ataatsimut kommune siammagaassaaq pingasunik pingaarnerusunik illoqarfilik tamarmik naligiimmik aqutsisoqarfeqartussat.
Kujataani kommunip iluani illoqarfimmut allamut nuunnerminni sulisut tamarmik atorfeqarnissartik qulakkeersinnaassavaat.
Nunaqarfinni Aqutsisut ullumikkutut ataannassasut aamma isumaqatigiissutaavoq, periarfissaqassappulli nunaqarfiit imminnut qanittut kattuteqatigiinnissaminnut.
Aningaasanik atugassarititaasut iluanni, innuttaasunik kiffartuussinerit assigiinngitsut ajorseriassutaanngitsumik nalimmassarneqassapput. Aamma ataatsimut kommuninngornissamut akileraarutinut procenti naleqqussarneqassaaq.
Kommunit Kujataamioqatigiit kattunnissaat sioqqullugu polikkikkut suliassatut taassumalu saniatigut allaffissornermik suliassanik siunissami anguniagassanik imalinnik miissueqqissaartussanik ataatsimiititaliortoqassaaq.
Borgmesterit Kristine Raahauge, Nanortalik, Simon Simonsen, Qaqortoq Kiista P. Isaksen–lu Narsamiit isumaqatigiissummik atsiortuupput.
