Kattuffimminnut isornartorsiuipput
Qaammatit arfinillit ingerlaneranni suli isumaqatigiissusiortoqanngilaq, akissarsiat ikinnerulerput, soraarsitsiortornerit ineqarnermilu pissutsit ajornerulersut.
Nordjyske Stiftstidende-mi atuartartut allagaanni Namminersorlutik Oqartussani atorfillit arfinillit kattuffitsik Djøf ilaatigut inatsisilerituunik, økonom-inik aamma allaffinni ingerlatsivinnilu atorfilinnik isumaqatiginninniussisartoq isornartorsiorpaat.
Kattuffitsik ilaasortaminnik Kalaallit Nunaanniittunik sumiginnaanerarpaat.
Atuartartut allagaat naapertorlugu Djøf-imi ilaasortat Namminersorlutik Oqartussani atorfillit qaammatini arfinilinni suli nutaamik isumaqatigiissuteqarfigineqarsimanngillat. Akissarsiaat pisiassat akitsoriartornerannut malinnaatinneqanngillat Namminersorlutillu Oqartussat atorfinitsitseqqusiunnaarallarnerisa kingunerisaanik ineqarnermi atugassarititaasut ajornerulerput. Atuartartut allagaanni allattut arfiniliusut naapertorlugit assersuutigalugu sulisut sisamat, inissiamut tallimanik initalimmut initaat 10 kvadratmeteriusut annertutigisumut inissinneqarsimapput.
- Kalaallit Nunaanni pissutsit taamaatsillugit kattuffik sumut atorneqarniarnersoq naluarput. Ilaasortaasugut qaammammut ataasiarluta ilaasortat aviisianik nassinneqartarpugut kattuffimmulli ilaasortaanermut akiliutivut aviisimuinnaq atorneqassappata aningaasat Afrikami meeqqanut ikiorsiissutigiinnarutsigit akiliutivut iluaqutaalaarsimasut malugissagaluarparput, allattut taama sakkortutigisumik isornartorsiuipput.
Soraarsitsiortornissamik ilimasaarisut aamma isornartorsiorneqarput. Atuartartut allagaat naapertorlugu Namminersorlutik Oqartussani soraarsitsiortornissamik ilisimasaarineq tusagassiuutitigut Djøf-mit aatsaat paasineqarpoq.
