Kattuffik Inuit qinnuteqaqqittariaqartoq

Qinnuteqaataammi akuerineqarsimanngilaq, suliniuterpassuarnullu anigaasassaarunnissaaq Bitha Metelmannip aarleqqutigaa.

-Kalaalerpassuit amerlasuut peqatigiiffimminni ataatsimoortarput katerisimaartarlutik imminnullu nukkassaqatigiittarlutik, aammalu kalaallit danmarkimut noorartut saaffiginnataramik peqatigiiffinnut tamannalu aamma amigaatigisorujussuanngussavaat.
Kattuffiup siulittaasua oqarpoq.

Kattuffik ukioq kingulleq 100 tusind koruuninik Namminersorlutik Oqartussaniit tapiiffigineqarsimavoq, maannakkullu tapiiffigitinissaminnut qinnuteqaataat akuerineqarsimanani.

Tapeeqqikkusupput
Kisianni kultureqarnermut naalakkersuisoq eqqissisaavoq.
Namminersorlutik Oqartussaniit Kattuffik allaffigineqarsimavoq, qinnuteqaqqinniarunik qanoq itinerusumik allanissaannik ilitsersuunneqarlutik, allatulli nassuiarluagaanerusumik qinnuteqaasiorunik, tapiiffigineqarnissaat ilimanarnerusoq, Nivi Olsen oqarpoq.

- Qinnuteqaammik eqqortumik tigusigutta tapeeqqikkusuppagut.

Naalakersuisoq oqarpoq, nassuiaallunilu:

 - Qinnuteqaataat tigungutsigu taava atorfilittat misissussuaat naammassisimaneraat piumasaqaatit, tassanngaanniillu aalajangerneqarumaarpoq taperneqassanersut. Erseqqissaassutigissuara mattunneqanngimmata aamma suliaat pingaarutilittut isigaagut kisianni allat assigalugit qinnuteqartariaqarput tassanngaanniit taava alloriarumaarpugut, Kultureqarnermut Naalakkersuisoq oqarpoq.