Kattuffiit suleqatigiinnerulernissartik siunniukkusuppaat
Sulisut kattuffii annertunerusumik suleqatigiinnissaq pillugu isumasioqatigiinnialerput.
Allattoq Louise M. Kleemann
novembarip 28-at 2008 13:49
Atorfillit Kattuffiat, AK, perorsaasut ilinniartitsisullu kattuffii, PIP aamma IMAK, peqqissaasut kattuffiat, PPK, kattuffiit allat peqatigalugit isumasioqatigiissapput qulequtalimmik ”Siunissami kattuffiit aaqqissuussaanerat – naammattumik piareersimaffigaarput?”
Isumasioqatigiinneq ammasumik pituttuiffiunngitsumillu kattuffiit akornanni, pisortani namminersortunilu sulisunut iluaqutaanerusussaq anguniarlugu suleqatigiinniartoqartoq, AK-mi siulittaasoq, Erik Hammeken oqarpoq.
Kattuffiit isumaqatigiinniarsinnaatitaasut 30-t qaaqquneqarput, sulisullu sinniisaat katillutik 50-it peqataanissaat naatsorsuutigineqarluni.
Ungasinngitsukkut inulerisut kattuffiisa ataatsimuulernissaat, perorsaasut kattuffiata, PIP-p siunnersuutigaa.
