Katsorsaavik Nuuk aamma Ilulissani

Taamaalilluni Namminersorlutik Oqartussat Frederiksberg Centerimik isumaqatigiissutaa marsip naanerani atorunnaarpat, Ilulissani Nuummilu imerajuttunut katsorsaasarnerit ingerlaannarnissaat qularnarunnaarpoq.

- Tassa neriuutigaarput aamma naatsorsuutigaarput apriilip aallaqqaataani tigoriarutsigit, taanna Ilulissani katsorsaavik ingerlarsimasup ingerlaannarnissaa neriuutigaarput, aamma maannakkumut taamatut isikkoqarpoq, Grethe Kramer Berthelsen, Katsorsaavik Nuuk-imik piginnittoq oqarpoq.

Katsorsaavik Nuuk imerajuttunik katsorsaasarnermik ukiumit nutaamit ingerlatsilerpat, katsorsaasarneq Nuummiinnaq ingerlanneqassanngilaq. Minnerpaamimmi arfineq pingasunik katsorsagassaqartillugu Katsorsaavik Nuuk sinerissami illoqarfinni ukiumut quleriarluni katsorsaajartortassaaq.

- Kommuunit suleqatigalugit inissatsinnik, katsorsaanermut tulluartumik, taavalu aamma katsorsaasut marluk inissaannik, katsorsaasussat tikinnginneranni kommuunit qulakkeerinnittassapput, Grethe Kramer Berthelsen oqarpoq.

Peqqinnissaqarfiup imigassamik ajornartorsiutilinnut Nunatsinni katsorsaasarnermut neqeroorutigisartagai Katsorsaavit Nuuk-imit ingerlanneqalerpata, katsorsaavik qaammatikkaartumik kiisalu ukiumut nalunaarusiortarnissaminut pisussaaffeqalissaaq.

- Isumaqatigiissutigineqarpoq qaammatikkaartumik atuisut qanoq amerlatigineranik nalunaarusiortoqartassasoq, taassumalu saniatigut isumaqatigiissutip ukiuni marlunni atuunnerani ukiumoortumik nalunaarusiortoqartassaaq, Peqqissutsimut Pitsaaliuinermullu Aqutsisoqarfiup pisortaa Kurt Nielsen oqarpoq.

- Katsorsaavik Nuuk ukiuni marlunni atuuttussamik isumaqatigiissuteqarfigivarput, piffissamilu tassani siunissamut qanoq ingerlariaqqinnissarput nalilersussavarput. Suleqatiginera ingerlatiinnassaneripput imaluunniit suliariumannittussarsiuusseqqissanersugut. Tassa taakkua nalunaarsuinerit takutikkumaarpaat, Kurt Nielsen oqarpoq.