Katiffissiorneq Kalaallit Nunaannut aamma attuumassuteqarpoq

Aamma kunngissap nuliata, Maryp, Nunatta pilerisaarutiginissaa piffissaqarfiginiarsimavaa.

Tamannalu pivoq Nunatsinnik assiliisartup, Carsten Egevangip, Polenimi illoqarfimmi Stettinimi assilisaminik saqqummersitsinerata pisortatigoortumik ammaanersiorneqarnerani.

- "GREENLANDIA"-mik taallugu assinik saqqummersitsinermi Kalaallit Nunaata Polenimi ilisimaneqarnerulernissaa kissaatigaarput, maanimiummi Kalaallit Nunaannut tunngasunik ilisimasakitsuararsuummata, Warswami Det Danske Kulturinstitutimi pisortaq, Boguslawa Sochanska, oqarpoq.

Taassuma Carsten Egevangip assilisai Kalaallit Nunaanni pinngortitami pingaartitanik takussutissiinermi pingaarnersatut taavai, Polenimilu ingerlaartitanik saqqummersitsineq saqqummersitsivigineqartuni takuniarneqarluartartoq oqaatigalugu.

Polenimi saqqummersitsinerup ammarneqarnerani Carsten Egevang nammineq najuuppoq, taassumalu kunngissap nulia assilisaminik qimerluueqatigalugu.

Assinik isiginnaarnerminni kunngissap nuliata oqaatigaa,  siullermeerlutik meeqqatik sisamat ilagalugit  Kalaallit Nunaannut aasaru tikeraarnissartik qilanaarigini.

Assinik saqqummersitsineq Polenimi ukiup sinnerani angallanneqassaaq, ilaatigut illoqarfimmi Katowiceimi saqqummersinneqassalluni.