Katersuiniarneq iluatsilluarpoq
Meeqqat pillugit suliniaqatigiiffiup Nanubørnip, Roskildemi aningaasanik katersuiniartitsinermi 30.000 koruunit angullugit isertippaat. Tassalu uani qaammammi kulturfestivaleqartitsinermi aningaasat katillugit 80.000 koruunit iserinneqarlutik.
Allattoq Apollo Jeremiassen
apriilip 27-at 2011 15:30
Roskildemi Hotel Prindsenimi illoqarfiup atisanik niuertarfiutaat arlallit ippassaq atisanik takutitsipput, tamassumali aallartinnginnerani erinarsortartoq Søs Fenger appisimaaqqaarpoq. atisanik takutitsineq Roskilde Zonta Klubimit niuertarfiit peqatigalugit aaqqissuunneqarpoq.
Atisanik takutitsinnginnermi Nanubørn Roskildemi kaffillerpoq eqqugassanik aamma akitsorterussinermik ilalerlugu. Tassani aningaasat 20.000 koruunit katersorneqarsimallutik.
Aprilip allartilaarnerani aamma Nanubørn neriniartarfimmi Snekkenimi nerersuartitsivoq kalaaliminernik nerisitsillutik, tassanilu aningaasat 40.000 koruunit katersorneqarsimallutik. Roskildep kommuniani kulturikkut suliniutinut aaqqissuisoq, Marie Berthelsen, tusarliussivoq.
