Katersugaasiviup allissutaa tunniunneqarpoq
Nuuk Kunstmuseum, tassalu eqqumiitsulianik katersugaasivik Nuummiittoq inuiattut ullorsiornitsinni immikkut ittumik aamma malunnartitsivoq, katersugaasiviup allissutaa naammassillugu saqqummersitsinertalerlugulu pisortatigoortumik ullumi tunniunneqarlunilu ammarneqarmat.
Katersugaasivik Svend Jungeugaluup ilaqutaasalu kommunemut tunniussaraat, allissutaalu naammassillugu kommunemut ullumi tunniunneqarpoq.
Qalersat aappaluttut marluk katersugaasiviup pioreersup matserfianut nutaartaatalu matserfianut nivinngarneqarsimasut Svend Jungep uillarnerata Helene Jungep kiisalu kommune sinnerlugu Maliinannguaq Marcussen-Mølgaardip qiorpaat.
Qiorsisoqareermat ilaqutariit Jungekkut sinnerlugit Orla Dalager eqqaaniaalluni oqaaseqarpoq.
- Avatangiisit uku kusanartut angumerinnginnakkit uggornaqaaq, avatangiisit kalaallit eqqumiitsuliaannut nuannareqisannut pilersikkumasimasatit. Tamatta neriuutigisimagaluarparput angumerissagit, ajoraluartumilli inuuneq naalagaaffiginngilarput. Orla Dalager taama oqarpoq.
Orla Dalager oqalugiarnermini aamma oqarpoq, angummi Svend Jungep eqqumiitsulianut nuannarinninnera takuneqarsinnaajuartartoq.
- Qalipakkat, tupilaat eqqumiitsuliullaqqissullu sumi tamani sullittut pillugit allaat sapilivinnissat tikillugu eqqartueqatigisarpatsigit. Manna ini katersugaasivillu kusanartoq tassaapput, eqqumiitsuliortunut atugassatut pilersitat. Eqqumiitsuliortut saqqummersitsivissaat maanna ilaqqipput, atorluariniarisiuk, taamaattumik anaanaga Helene qatanngutikkalu sinnerlugit Nuummi innutaasunut tunissutivit kingullersaat tunniutissallugu nuannaarutigaara. Orla Dalager ilaatigut taama oqarpoq.
- Aatsaat siullerpaamik Nuummi nappaasoqarpoq ataasiinnarmik siunertalimmik, tassalu eqqumiitsulianik saqqummersitsivimmik. Qularutiginngilara illoqarfitsinni nunattalu sinnerani eqqumiitsuliortut sanaaminnik ullutsinnut naleqquttumik saqqummersitsiveqalernertik nuannaarutigissagaat. Nuup Kommunea sinnerlugu Maliinannguaq Marcussen-Mølgaard ilaatigut taama oqarpoq.
