Katersugaasivik kalaallit pillugit saqqummersitsiniarpoq
Tassami katersugaasiviup piffissani assigiinngitsuni Danmarkimi innuttaasut katitigaanerat isiginiarneqarnerussasoq neriuutigaa.
"Den Gamle By" Århusimiittoq katersugaasiviuvoq uumassusilik, illutoqqanik 1500-kkunneersunik tamassumalu kingornaneersunik illutalik. Danmarkimi qanga inuuneq paasisaqarfiginiarlugu takuniaasut, illumiit illumut takusassarsiorsinnaapput. Danmarkimi oqaluttuarisaanermi ikinnerussuteqarlutik innuttaasut kalaallit, katersugaasivimmi maannamut inissaqartinneqarsimanngillat, maannali tamanna allanngortinneqassaaq, katersugaasiviup pisortaa Thomas Bloch Ravn taama nassuiaavoq.
- Danmarkimi innuttaasut qimerlooraanni, 70-ikkunni kalaallit ingammik isumaginninnermik peqqissutsimullu tunngasunik ilinniagaqartut amerlaqaat. Taamanikkummi Kalaallit Nunaanni innuttaasut 14-ileereersimasut 15 procentii Danmarkimi najugaqarput, taakkulu ilarpassui ilinniagaqartuullutik.
Taamaattumik katersugaasivimmi Den Gamle By-mi ineeqqamik qalianiittumik pilersitsisoqarpoq, kalaallimit ilinniartumit inigineqartutut pequsersorneqartumik. Inissiarsuaq illoqarfiup immikkoortuata ilaaniittussaq, 1974-imisut isikkoqartillugu sananeqassaaq.
- Katersugaasivimmi Den Gamle By-mi inuiaqatigiit taamanikkut isikkuat, takutinniarneqarpoq. Takutinniakkavut tassaapput, ilaqutariit assigiinngitsunik atugassaqartitaasut aamma naggueqatigiit assigiinngitsut. Inissiarsuarmi kalaallimit ilinniartumit najugaqarfigineqartussap ilaani inissiaqassaaq Tyrkiamiunit ilaqutariinnit taamanikkut Danmarkimut suliartortunit najugarineqartumik.
Taamaattorli katersugaasivik Den Gamle By, kalaallit ilinniartut taamanikkut qanoq inuuneqarnerannik misissuinerminni ikiortissarsiorput. Taamaattumik kalaallit 70-ikkunni Danmarkimi ilinniartuusimasut, katersugaasivimmit attavigineqarusupput.
- Pitsaanerpaamik piviusorsiortumillu takutitserusukkatta. Taamaattumik piffissami tamatumani Danmarkimi ilinniartuusimasunik attaveqarusuppugut, 70-ikkut aallartilaarneranni kalaallit Danmarkimi ilinniartut inuunerannik annerusumik paasisaqarusukkatta. Taamanikkut qanoq najugaqarpat? Sunik assiliaateqartarpat? Nipilersukkat sorliit tusarnaarneqartarpat? Nerisassanik aalajangersimasunik mamarisaqartoqarpa? Ilaalu ilanngullugit. Taamaalilluta kalaalllip ilinniartup ineeraa piviusorsiortoq pilersissinnaaniassagatsigu.
Illoqarfiup immikkoortortaata 1974-imeersup 2014-ip naalernerani naammassinissaa naatsorsuutigineqarpoq.
Danmarkimi illoqarfiit annerit ilaanni 70-ikkunni ilinniartuusimaguit oqarasuaammut 86 12 31 88-imut sianersinnaavutit imaluunniit Den Gamle By internetikkut uunga allaffigisinnaavat: mail@dengamleby.dk.
