Katersugaasiviit minitaavallaartarsorai

Atuagalliutini atuartartut allagaanni Narsami katersugaasiviup pisortaata Rie Oldenburgip isoraa, nunatsinni katersugaasivilerisut kultureqarnermi siunnersuisooqatigiit pilersinneqaqqinneranni inissaqartinneqannginnerat.

Kultureqarnermi siunnersuisooqatigiit eqqumiitsuliortunik inuttaqartinneqarput. Rie Oldenburgilu aperaarput sooq katersugaasivilerisut kultureqarnermi siunnersuisooqatigiinni ilaasariaqarsorinerai.

- Katersugaasivilerisuusugut malunnanngippallaarujussuaqaagut. Ukulu kultureqarnermi siunnersuisooqatigiinngorlaat takutippaat taamatuttaarlumi aamma nalunaarusiami erserpoq arlaannaataluunniit katersugaasivilerisut kulturimut tunngatillugu eqqarsaatigineq ajoraat, Rie Oldenburg oqarpoq.

Taanna nassuiaavoq taamatut allaaserisaqartariaqarsimalluni assorujussuaq uggornartuutikkamiuk kulturikkut nalillit kinaassutsimullu tunngaviusut katersugaasivinni pigineqartuummata.

- Katersugaasivimmiipput kalaallit siuliinut tunngassuteqartorpassuit. Paasineqarsinnaalertarpoq sooq ullumikkut maaniinnersugut qanorlu ililluta tamaanga killissimanersugut. Taamaattumik katersugaasiviit puiguinnarneqarsinnaanngillat soqutaanngitsutullu isigineqarlutik, Rie Oldenburg oqarpoq.

Taanna aperaarput nammineq isummani naapertorlugu Namminersornerullutik Oqartussat tusagassiuutillu qanoq iliorsimasariaqaraluarnersut.

- Kultureqarnermi siunnersuisooqatigiit iluanni katersugaasivissuup ilaasortaqaqqunaraluarpoq, akivoq.

Qalleqqillugulu aperaarput allakkiamini ilanngullugu allassimagaa katersugaasivilerisut saqquminerusariaqaraluartut, tamannalu qanoq isumaqartinneraa.

- Naalappallaarlutalu pikkunaappallaarlutalu qanganisarpasippallaarutta ingasattumillu eqqisisimavallaarluta taava soqutigineqannginnerussaagut. Akerlianilli inuiaqatigiit iluanni aalassassimaarutaasunut peqataasarutta taava sunniuteqarsinnaanerussaagut oqallisaasunullu mininneqaraluartunut tikkuaasinnaanerussalluta, Rie Oldenburg oqarpoq.