Kastrupimi suliumajunnaarneq nunatsinnukartussanut eqquinngilaq
Københavnip mittarfiani sulisut arlaqartut sulinerminnik unititsipput, tamatumalu kingunerisaanik timmisartut aallartut tikittullu kinguaattoorlutik. Sulinerminik unititsineq nunatsinnut timmisartuussinermut eqquinngilaq.
Allattoq Jaaku Lyberth
Timmisartoqarfimmi sulisut sulinertik aallarteqqissimagaat, nutaarsiassaqartitsivik ritzau taamatut allaaserisaqarpoq.
Mittarfimmi sulisut nerisarfii, kantinat marluk avataanut suliariumannittussarsiuunneqarnerat, sulinermik unititsinermut pissutaatinneqarput.
Mittarfimmi sulisut sulinermik unitsitsineranni, timmisartunut ilaasussat isumannaallisaanermut isumaginnittoqarfiatigut aqqusaarsinnaasimanngillat, soorluttaaq nassatat ingerlaarfiini sulisut, eqqiaasut aputaajaasullu sulinertik unitsikkaat, Københavnip mittarfiani paasissutissiisartut pisortaat Henrik P. Jørgensen oqarpoq.