KNR-imi oqalliffik nutaaq Kassoq inersimasunut inuusunnerusunut
Kassoq pingaarnertut 25-nit 35-nut ukiulinnut saaffiginnittuuvoq, taamaattumik oqallinneq oqallissaarutillu ilaat facebookimi pisassapput – aammali TV raatiulu oqallitsitsiffiusassapput.
Taamatut ukiulinnut qulequttanik naleqquttunik toqqagaqarnitta saniatigut, taamatut ukiullit ilarpassui KNR raatiu TV-lu pingaarnertut atugarinagit, nittartakkat internetikkullu inuit naapittarfii atugarinerugaat nalunngilarput. Taamaattumik raatiukkut TV-kkullu oqallitsitsilersigata facebook aqqutigalugu oqallissaarisassagut, nutaarsiassaqartitsivimmi pisortaq Mikkel Bjarnø Lund oqarpoq.
Kassoq facebook-imi
Qulequttat tamarmik immikkut videonik aallarniuteqartassapput, taakku facebookimut ilineqartassapput. Tamatuma kingorna oqallinneq, aaqqissuisut raatiukkut ingerlateqqissavaat, tassani inuit apeqqutinik qisuariaatiminnillu facebookikkut toqqaannartumik allassinnaanissaminnut periarfissaqassallutik. Qulequttat tamarmik immikkut sisamanngornerit allortarlugit tv-kkut oqallinnermik naggaserneqartassapput. Issuaanerit pingaarutillit, aamma raatiukkut tv-kkullu oqallinnermit tigulaakkat facebookimut oqallisigisassanngorteqqillugit ilineqartassapput.
Kassormi oqallitsitisuussapput aaqqissuussisuullutillu Malu Pedersen aammalu Eqaluk Høegh, Johansinnguaq Olsen teknikkikkut aqutsisuussalluni. Taakku aallartinnissaminnut qilanaarput.
Inissaaleqinermut tunngasoq siullermeerluta oqallitsitsilerutta sammissavarput. Inuunermi namminiilerniaqqaarfimmi aporfissat siulliit angisuut taanna ilagaat. Video siulleq piareeqqavoq facebookimullu ullumi ilineqassalluni. Taama ukiullit inissaaleqinermik eqqugaasut oqaloqatiginissaat qilanaaraarput, taakkumi oqallitsitsinissamut tunngaviussapput. Oqallitsitsineq imaqarluartoq kipparippallaanngitsorlu anguniarparput, Malu Pedersen oqarpoq.
Inuiaqatigiit oqallinneranni inuusunnerusut peqataanerusariaqarput. Periarfisseeqataanissarput nuannaarutigaarput neriuutigalugulu atorluarneqassasoq, Eqaluk Høegh oqarpoq.
Kassoq tassaalerpoq KNR-ip oqalliffinni ukiup affaani uani aallakaatitsiviusumi aaqqissuusaasa pingajussaat.
- Qiviarfik pilerseqqammerparput, utoqqaanerulaartunut taanna saaffiginnittuuvoq. Isummersorfiup aallakaatittarnera nangeqqissavarput, tassani tusagassiorneq apeqqusiinertalik tunngavigalugu oqallitsitsisoqartartarpoq. Kisianni tassa inuusuttunut inersimasuunermut ikaarsaariartunut saaffiginnittoq qangali amigaartigaarput. Tamannalu tassa iliuuseqarfigalugu. Soorunami neriuutigaarput tigulluarneqarumaartoq minnerunngitsumillu eqeersimaartumik peqataaffigineqarluni, Mikkel Bjarnø Lund oqarpoq.
Kassoq facebookikkut ullumikkut saqqummeqqaarumaarpoq. Kiisalu arfininngorpat ataasinngorpallu saqqummiussissallutik. Raatiukkut siullermeerluni marlunngorpat februaarip arferngani nal . 16.07 oqallitsitsisoqassaaq. Sisamanngorpallu februaarip arfineq pingajuani TV-kkut nal. 20.00 siullermeerluni oqallitsitsisoqassalluni. Kassoq maaji naanerata tungaanut oqallitsitsisoqartarumaarnissaa pilersaarutaagallarpoq.
