Kasper Brandt Iginniarfimmiu Herstedvesterimi inissitassatut eqqartuunneqartoq
Qaasuitsup Eqqartuussiveqarfiata siorna decembarimi eqqartuussisoqarneranit aalajangiussamut, Kasper Brandtip unnerluussisussaatitaasullu eqqartuussummik ingerlatitseqqiinnerannik kinguneqartumut ullumi eqqartuussinermi pineqaatissinneqarnera sukannernerulersinneqarpoq.
Unnerluussisussaatitaasut nikanarsagaasimasutut taarsiiffigineqarnissamut piumasaqaatigisimasaat 330.000 koruuniusut 70.000 koruuninik amerlineqarput. Taamaalilluni unnerluutigineqartoq nikanarsagaasimasunut, inuusuttut ornittagaannut Qeqqata Kommunianullu katillugit 408.000 koruuninik taarsiisussanngorluni eqqartuussaavoq.
Kasper Brandt unnerluutiginnissutinut katillugit 14-inut pisuutinneqarpoq, tassa pinngitsaaliilluni atoqatiginninnermut, tavatsitseriarnermut, kannguttaatsuliornermut peqquserlunnermullu unnerluutigineqarluni. Unnerluutiginnissutillu 14-it tunngavigalugit pisuutinneqarluni pineqaatissinneqarpoq.
Nunatta eqqartuussiviata pineqaatissiinerminut tunngavilersuutigaa, unnerluutigineqartup pinerlinneqartunik atoqateqaraangami piginnaaneqarnerusutut inissisimanini atornerluttarsimagaa.
Aalajangeriikkat sukannernerulersinneqarput
40-nik ukiulik Qaasuitsup Eqqartuussiveqarfiani siorna decembarimi piffissamik killiligaanngitsumik Danmarkimi Herstedvesterimi parnaarussassanngortinneqarpoq. Taamani unnerluutiginnissutit 14-it amerlanersaat tunngavigalugit pisuutinneqarluni pineqaatissinneqarpoq. Kisianni 18-it inorlugit ukiulinnut sisamariarluni pinngitsaaleeriarsimasutut pinngitsuutinneqarluni.
Taakkununngali nunatta eqqartuussiviani pisuutinneqarluni eqqartuunneqarpoq.
Taakkua saniatigut Qaasuitsup eqqartuussiveqarfianit pinngitsaaliinermut pinngitsuutinneqarpoq, kannguttaatsuliornermullu taamaallaat pineqaatissinneqarluni. Taannali aamma nunatta eqqartuussiveqarfiata sukannernerulersippaa pinngitsaaliisimasutut pineqaatissillugu.
Kissaataa eqquutsinneqanngilaq
Kasper Brandtip Qaasuitsup eqqartuussiveqarfiata aalajangigaa suliareqqitassanngorlugu ingerlatitseqqippoq, nukappiaqqamut qulingiluanik ukiulimmut pinngitsaaliinermut niviarsiaqqamullu 16-inik ukiulimmut arlaleriarluni pinngitsaaliinermut pingitsuutinneqarnissani, unnerluutiginnissutinullu sinneruttunut sakkukinnerusumik pineqaatissinneqarnissi kissaatigalugu.
Eqqartuussisoq Jimmy Bøgh Vietland allarluinnarmik iliuuseqarpoq.
Inissiisarfimmut tarnip pissusaanik ilisimasalinnit aqunneqartumut piffissami killiligaanngitsumi inissinneqartussatut eqqartuunneqarpoq. Kasper Brandt tarnimigut napparsimasutut naliligaanngikkaluarpoq, inoqatiminulli ulorianartorsiortitsisutut nakorsat eqqartuussinermi siunnersortaasartut nalilerpaat.